सरकारका प्रवक्ता सञ्चार तथा सूचना प्रविधि मन्त्री जगदीश खरेलले प्रमुख तीन दल नेपाली कांग्रेस, नेकपा एमाले, नेपाली कम्युनिस्ट पार्टीका शीर्ष नेताहरूसँग छुट्टाछुट्टै भेटवार्ता गरेका छन्। उनले कांग्रेस सभापति शेरबहादुर देउवा, एमाले अध्यक्ष केपी शर्मा ओली, नेकपामा संयोजक पुष्पकमल दाहाल ‘प्रचण्ड’सँग शुक्रबार भेटवार्ता गरेका हुन्।
‘मैले तीनवटा ठूला राजनीतिक दलका शीर्ष नेतालाई भेटेँ। तीनवटै शीर्ष नेताले स्पष्ट रूपमा के भन्नुभएको छ भने हामी चुनावको विरोधी होइनौं,’ उनले भने, ‘खास गरेर निर्वाचनको वातावरण बनाउनका लागि, फागुन २१ गते हुने निर्वाचनको वातावरण बनाउनका लागि राजनीतिक दलका शीर्ष नेताहरूसँग भेटघाट भएको हो।’
नेपाली कांग्रेसका सभापति शेरबहादुर देउवाले कांग्रेस पार्टीको प्राथमिकता चाहिँ निर्वाचन नै भएको बताएको मन्त्री खरेलले भने।
‘नेपाली कांग्रेसको प्राथमिकता संसद पुनःस्थापना होइन भनेर स्पष्ट रूपमा उहाँले मसँगको कुराकानीमा बताउनु भएको छ। निर्वाचनको वातावरण बनाउनका लागि उहाँले सरकारसँग आग्रह गर्नुभएको छ। सुरक्षाको वातावरण बनाउनुपर्यो भन्ने चासो उहाँको रहेको छ। कांग्रेसको तर्फबाट निर्वाचन गर्नका लागि गर्नुपर्ने सम्पूर्ण सहयोग नेपाली कांग्रेसले गर्छ भन्ने कुरा उहाँको रहेको छ,’ उनले भने।
नेकपा एमालेका अध्यक्ष केपी शर्मा ओलीले निर्वाचनको सन्दर्भमा केही सुरक्षाको चासो राखेको उनले बताए।
‘सुरक्षाको प्रत्याभूति, निर्भयताका साथ चुनावमा भाग लिने भोट हाल्ने र राजनीतिक दलहरूले भाग लिने वातावरण बनाउनुपर्छ, त्यो अझै बनिनसकेको हो कि अझै बढी सरकारले मिहिनेत गर्नुपर्छ भन्ने उहाँहरूको रहेको छ,’ उनले भने, ‘सिद्धान्ततः नेकपा एमाले जनमतलाई मान्ने पार्टी हो, लोकतन्त्रमा विश्वास गर्ने पार्टी हो। निर्वाचनबाटै फ्रेस म्यान्डेट लिएर अगाडि बढ्नुपर्छ भन्ने कुरामा द्विविधा छैन। त्यसमा नेकपा एमाले त्यो लाइनमा स्पष्टरूपमा छ। तर अहिले व्यवहारिक रूपमा सुरक्षाको हिसाबले चुनाव गराउन सक्ने अवस्था छ कि छैन भनेर उहाँहरूले चासो राख्नुभएको छ। सुरक्षाको वातावरण बनाउनुपर्यो, चुनावको वातावरण बनाउनुपर्यो भन्ने उहाँहरूको कुरा रहेको छ।’
त्यो सन्दर्भमा सकारकारको तर्फबाट आफूले सुरक्षाको वातावरण बनाउने कुरामा प्रतिबद्ध रहेको कुरा राखेको उनले बताए।
नेपाली कम्युनिस्ट पार्टीका संयोजकका प्रचण्डले निर्वाचनको विकल्प नभएकाले जसरी पनि निर्वाचनमा जानुपर्ने बताएको मन्त्री खरेलले बताए।
‘फागुन २१ मै निर्वाचन हुनुपर्छ भन्ने नेपाली कम्युनिस्ट पार्टीको स्पष्ट धारणा रहेको उहाँले दोहोर्याउनुभएको छ। निर्वाचनका लागि सरकारलाई सहयोग गर्ने, प्रतिबद्धतासमेत व्यक्त गर्नुभयो,’ उनले भने।
-1756794700.JPG)
-1746009348.jpg)
