नेकपा एमालेका महासचिव शंकर पोखरेलले पुराना पार्टीलाई हराउन नयाँहरू मिल्नुपर्छ भन्ने धारणा अघि सार्न खोजेको बताएका छन्।
शुक्रबार राति आफ्नो आधिकारिक फेसबुकमा लेख्दै उनले यस्तो बताएका हुन्।
पोखरेलले राजनीतिमा पुरानो र नयाँ भन्नुको कुनै अर्थ नहुने, बरू एजेन्डा र गन्तव्यको विशेष अर्थ र महत्त्व हुने बताएका छन्।
'नेपाललाई समेत बंगलादेशजस्तै बनाउन हिँडेका व्यक्तिहरू असफल हुँदै गएपछि पुराना पार्टीलाई हराउन नयाँहरू मिल्नुपर्छ भन्ने धारणा अघि सार्न खोज्दैछन्। राजनीतिमा पुरानो र नयाँ भन्नुको कुनै अर्थ हुँदैन। त्यहाँ एजेन्डा र गन्तव्यको विशेष अर्थ र महत्त्व हुन्छ,' उनले लेखेका छन्।
नीति र एजेन्डा विहीनहरूलाई नयाँको पगडी गुथाउँदैमा राजनीतिक विकल्प तयार हुन्छ भन्नु भ्रम मात्र भएको पनि उनले बताएका छन्।
'वास्तवमा पार्टीहरूको इतिहास पुरानो हुन सक्छ, तर नीति र नेतृत्व समय अनुसार अद्यावधिक भइरहँदा पार्टी सधैं जीवित र सान्दर्भिक रहन्छन्। त्यसैले लामो इतिहास भएका राजनीतिक दलहरू समेत कहिल्यै पुराना हुँदैनन्,' महासचिव पोखरेलले भनेका छन्, 'किनकि उनीहरू समय अनुसार अद्यावधिक भइरहन्छन्।'
समय अनुकूल चल्न नसक्ने राजनीतिक दलहरू मात्र समाप्त हुने उनले लेखेका छन्। नेपाली राजनीतिमा यस्ता दृष्टान्त पर्याप्त भएका पनि उनले बताएका छन्।
नेकपा एमाले नेपालका राजनीतिक दलहरूमध्ये नीति र नेतृत्वलाई निरन्तर परिमार्जन गर्दै आएको पार्टी भएको उनले लेखेका छन्।
एमालेसँग वर्तमान मात्र होइन, भविष्यको नेतृत्व गर्ने स्पष्ट सोच र संकल्प भएको भन्दै पार्टीको यही जीवन्तता र सान्दर्भिकताबाट डराएकाहरूले नयाँहरू मिल्नुपर्छ भन्ने कुरा उठाइरहेका उनले लेखेका छन्।
उनले रवि लामिछाने, बालेन शाह, हर्क साम्पाङ, कुलमान घिसिङ कोही पनि नेपाली राजनीतिका लागि नयाँ नभएको पनि बताएका छन्। उनीहरू सबै कुनै न कुनै रूपमा राजनीति र राज्यसत्तामा परीक्षण भइसकेका पात्र भएको महासचिव पोखरेलले लेखेका छन्।
'नेपाली राजनीतिका लागि को नयाँ? रवि, बालेन, हर्क साम्पाङ वा कुलमान? उनीहरू सबै नेपाली राजनीति र राज्यसत्तामा कुनै न कुनै हिसाबले परीक्षण भइसकेका पात्र हुन्। जहाँसम्म जेनजीका नाममा चर्चित बनेको जेन जेड समूहको सन्दर्भ छ, यो कुनै संगठित शक्ति होइन, यो एउटा उमेर समूह मात्र हो। जो सूचना र प्रविधिको विकाससँग हुर्कियो,' उनले लेखेका छन्।
उनी थप लेख्छन्, 'यो समूहलाई जननिर्वाचित सत्ताका विरूद्ध प्रयोग गर्न सकिन्छ भन्ने सोच पुँजीवादी साम्राज्यवादीहरूले बनाएको सोच हो। डिप स्टेटको अवधारणा जननिर्वाचित सत्ता र जनतामा भिजेका नेताहरूलाई कमजोर बनाउन षड्यन्त्रको सिद्धान्त प्रयोग गर्दै कथित कलर रिभोलुसनका नाममा विद्रोहको कोसिस गर्ने गरिन्छ।'
नेपालका सन्दर्भमा जेनजी अभियानीहरूले सुरू गरेको प्रदर्शनमा घुसपैठ गराएर त्यही दिशामा अघि बढाउने कोसिस भइरहेको कुरा साँचो भएको पनि उनले दाबी गरेका छन्।
तर नेपाली समाज र नेपालका नवयुवाहरूको ठूलो हिस्साले छोटो समयमा त्यो 'षड्यन्त्र' बुझ्न सफल भएको उनले बताएका छन्।
भदौ २३ को प्रदर्शनका अभियानीहरू नै अहिले षड्यन्त्र विरूद्ध प्रतिवादका लागि एमाले नेतृत्वसँग निरन्तर संवादमा रहेको उनले लेखेका छन्।
'वास्तवमा भन्ने हो भने चौतर्फी घेराबन्दीका बाबजुद नवयुवाहरूबीच अहिले पनि एमाले नयाँ भनिनेहरूभन्दा लोकप्रिय छ,' पोखरेलले भनेका छन्, 'पछिल्लो समय देशविरूद्ध भइरहेका षड्यन्त्रबारे नवयुवाहरूले जति जति बुझ्न थालेका छन्, त्यति नै उनीहरू एमाले प्रति प्रतिबद्ध देखिन थालेका छन्। एमाले र यसको नेतृत्व देशका लागि अपरिहार्य रहेको महसुस गर्न थालेका छन्।'
पछिल्लो समय पुरानाका विरूद्ध नयाँहरूलाई जसरी पनि मिलाउने कोसिस त्यसकै परिणाम भएको उनले बताएका छन्। तर अब त्यसको कुनै सान्दर्भिकता नदेखिएको पनि उनले बताएका छन्।
-1756794700.JPG)
-1746009348.jpg)
