काठमाडौं महानगरपालिकाका मेयर बालेन शाह, राष्ट्रिय स्वतन्त्र पार्टीका सभापति रवि लामिछाने, उज्यालो नेपाल पार्टीका संरक्षक कुलमान घिसिङबीच एकताको चर्चालाई नेकपा (एमाले)का नेता प्रदीप ज्ञवालीले सकारात्मक भनेका छन्।
सामाजिक सञ्जाल फेसबुकमा स्ट्याटस लेख्दै नेता ज्ञवालीले विचार मिल्नेहरू एकठाउँमा उभिनु राम्रो रहेको बताएका हुन्।
यद्यपि विचार मिलेको हो वा स्वार्थ भन्ने विषय समयले बताउने उनले बताए।
‘त्यसमाथि, सिंहदरबार जलाउने या जल्दा उत्सव मनाउनेहरु पनि लोकतान्त्रिक प्रतिस्पर्धाबाट त्यही सिंहदरबारमा पुग्न खोज्नु सकारात्मक हो,’ उनले लेखेका छन्।
तर पछिल्लो समय बाक्लिएको भेटघाटलाई लिएर भ्रामक तरंग ल्याउन खोजिएको नेता ज्ञवालीले बताएका छन्।
‘मानौँ, आजसम्म नेपाल नबनेकै अमुक व्यक्तिहरु नमिलेर हो। जस्तो कि दक्षिण भारतीय चलचित्रहरुमा देखिन्छ- कुनै नायक रङ्गमञ्चमा उत्रेर ढ्याक्क खुट्टा बजार्छ, तुफान सिर्जना हुन्छ, अनि सबै खलनायकहरु सोत्तर हुन्छन्!,’ उनले भनेका छन्।
‘ती व्यक्तिहरूको मिलनले त्यस्तै‘तारणहार’ जन्माउँछ र देशले मुक्ति पाउँछ भन्ने भ्रान्ति फैलाउन खोजिँदैछ,’ ज्ञवालीले अगाडि लेखेका छन्।
तर यस्तो तिलस्मी तत्वको खोजीले मुलुकलाई कहीँ पनि नपुर्याउने उनले बताएका छन्।
देश बनाउनमा व्यक्तिको भूमिका पनि रहने सँगै विचार, संस्था, प्रणाली र सामूहिकता आवश्यक रहने उनको भनाइ छ।
‘कस्तो शासन प्रणाली अपनाउने ? कस्तो आर्थिक नीति लिने ? बहुलता र विविधताले भरिएको समाजमा सामाजिक प्रबन्ध कस्तो हुने ? तीव्र रुपमा बदलिइरहेको भूराजनीतिक परिदृश्यमा राष्ट्रिय हितको संरक्षण कसरी गर्ने ? जलवायु परिवर्तन जस्ता भयावह चुनौतीको सामना कसरी गर्ने ? संविधानका कुन विषय संरक्षण गर्ने र के परिमार्जन गर्ने ? यावत् प्रश्नमा कुनै विकल्प छैन,’ उनले भनेका छन्, ‘छ त केबल नकारात्मकता, निषेध र घृणा।’
ज्ञवालीले मिडियामाथि पनि कटाक्ष गरेका छन्।
‘कतिपय मिडियामा देखा परेको ‘युफोरिया’ हेर्दा दुई दशक अगाडिका घटनाहरू याद आए, जतिबेला ‘जनसरकार’ घोषणाको समाचार कभर गर्न हेलिकप्टर चार्टर गरिन्थे ।ओहो, हिंसाको त्यो महिमागान ! नयाँ दिनका ती अभ्यर्थना ! र नयाँ नेपालका ती सपना ! आज त्यो ‘मिडिया हाइप’ निर्मित बिम्ब कपुरको बास्ना झैँ विलोप भइसकेको छ,’ उनले लेखेका छन्।
उनले घोडा पानीदार हो कि होइन भन्ने टुङ्गो लामो दौडले नै तय गर्ने बताएका छन्। त्यसकारण समाजलाई भावकुभन्दा तर्कसंगत बनाउन सघाउनका लागि ज्ञवालीले अपिल गरेका छन्।
‘स्वप्न भङ्गताको क्षण साह्रै पीडादायी हुन्छ,’ उनले लेखेका छन्।
-1746009348.jpg)
