मर्मत र अफिस सेटअप भइरहेको बालेनको पार्टी कार्यालय (तस्बिरहरू)

सेतोपाटी संवाददाता

काठमाडौं, पुस १२

पार्टी निर्माणका लागि काठमाडौं महानगरपालिकाका मेयर बालेन शाह मंगलबारदेखि तीव्र छलफलमा छन्।

उनले राष्ट्रिय स्वतन्त्र पार्टी (रास्वपा), ऊर्जामन्त्री कुलमान घिसिङ लगायत विभिन्न राजनीतिक दलका नेताहरू, स्वतन्त्र व्यक्तिहरू लगायत जेनजी युवाहरूसँग पनि लगातार छलफल गर्दै आइरहेका छन्।

ती सबैको छलफलको ठोस नतिजा शनिबार साँझसम्म आइसक्ने आकलन छ।

आइतबार र सोमबार आगामी निर्वाचनका लागि समानुपातिक उम्मेदवारको बन्द सूची निर्वाचन आयोगमा बुझाउनुपर्नेछ। त्यसअघि नै बालेनले आफू सहभागी हुने दलको टुंगो लगाउने उनी निकट नेताहरू बताउँदै आएका छन्।

शनिबार पनि ऊर्जामन्त्री कुलमान घिसिङसँग छलफलमा छन्।

रास्वपासँग अझै सहमति जुटिसकेको छैन। रास्वपासँग सहमति नजुटेको अवस्थामा तत्कालका लागि बालेन र कुलमान मिलेर अघि बढ्ने निश्चित करिब छ।

उनीहरुबीच यसअघि मिलेर नै देश विकास पार्टी अघि बढाउने मोटामोटी सहमति भइसकेको छ।

देश विकास पार्टी निर्वाचन आयोगमा दर्ता छ। यसको अध्यक्ष सन्ध्या खनाल छिन् भने चुनाव चिह्न लौरो छ। लौरो चिह्नबाटै २०७९ को स्थानीय तह निर्वाचनमा बालेन काठमाडौंको मेयर निर्वाचित भएका थिए।

बालेन र कुलमानबीच देश विकास पार्टीबाटै प्रतिनिधि सभा समानुपातिकतर्फ उम्मेदवार उठाउने सहमति पनि भएको छ र सोहीअनुसार शनिबारसम्म ११० क्षेत्रका उम्मेदवार तय गरेर पुस १३ र १४ गते निर्वाचन आयोगमा सूची बुझाउने तयारी भएको बालेन र कुलमाननिकट स्रोतको दाबी छ।