प्रधानमन्त्री सुशीला कार्की र तीन प्रमुख दलका शीर्ष नेताहरुबीच छलफल जारी छ।
प्रधानमन्त्री कार्कीको निमन्त्रणमा नेपाली कांग्रेसका सभापति शेर बहादुर देउवा, नेकपा (एमाले)का अध्यक्ष केपी शर्मा ओली र नेपाली कम्युनिस्ट पार्टीका संयोजक पुष्पकमल दाहाल 'प्रचण्ड' अपराह्न पौने ४ बजे बालुवाटार पुगेका थिए।
छलफलको सुरूवातमा प्रधानमन्त्री कार्कीले आफ्नो निमन्त्रणा स्वीकार गरी उपस्थित भएकामा तीन नेताहरूलाई धन्यवाद ज्ञापन गरिन्।
प्रधानमन्त्री कार्कीले सरकारले राष्ट्रपतिबाट प्राप्त कार्यादेश अनुसार चुनाव गराउनका लागि सरकारले तयारी तीव्र पारिरहेको बताइन्।
'यो घर तपाईँहरूकै हो। म त न्याय क्षेत्रको मान्छे। राष्ट्रपतिज्यूबाट चुनाव गराउने कार्यादेश पाएबमोजिम हामी चुनावको तयारी गरिरहेका छौं,' उनले शीर्ष नेताहरूसँग भनिन्।
प्रधानमन्त्री कार्कीले चुनावमा पूरै होमिनका लागि रक्षाबाहेक आफूसँग राखेका अरू मन्त्रालय पनि अरू मन्त्रीलाई जिम्मा लगाइसकिएको बताइन्।
त्यसकारण निर्वाचनलाई सफल पार्नु पर्ने विषयमा छलफल गर्नका लागि आफूले नेताहरूलाई बोलाएको प्रधानमन्त्री कार्कीले बताइन्।
मैले यहाँहरूलाई बोलाएर बिन्ती गर्न खोजेको के भने यो निर्वाचन जसरी पनि सफल पारौँ। सबै यसमा सहभागी हुनुपर्छ। तपाईँहरू निर्वाचनका लागि तयारै हुनुहुन्छ भन्ने नै मैले देखेकी छु। त्यस्तो वातावरण बनिरहेको देख्छु। यो स्वागतयोग्य छ,' प्रधानमन्त्री कार्कीले दलका नेताहरुलाई भनिन्।
निर्वाचन आयोग र प्रहरी प्रशासनलाई पनि भनेजति नै स्रोतसाधनको व्यवस्था गरेको प्रधानमन्त्री कार्कीले बताइन्।
'सुरक्षाकर्मीको मनोबल बढेको कुरा त यहाँहरुले पनि महसुस गर्नुभएकै होला। हामी त्यसरी काम गरिरहेका छौं। अब कुनै अलमल नगरी यो राष्ट्रको भविष्य सम्झेर, स्थिर र दिगो लोकतन्त्रको सुनिश्चितताका लागि चुनाव सफल पारौँ। यो हामी सबैको जिम्मेवारी हो। यत्ति अनुरोध गर्न मैले यहाँहरूलाई आज निम्ता गरेकी हुँ,' प्रधानमन्त्री कार्कीको भनाइ थियो।
-1766830010.jpg)
-1756794700.JPG)
-1746009348.jpg)
