सानो घर, एउटा गाडी र सहज शिक्षा र स्वास्थ्यको पहुँच नै नेपाली युवाको आशा- मन्त्री घिसिङ

सेतोपाटी संवाददाता

काठमाडौं, पुस १२

अन्तरिम सरकारका भौतिक पूर्वाधार तथा यातायात मन्त्री कुलमान घिसिङले सानो घर, एउटा सवारी साधन र शिक्षा, स्वास्थ्यको सहज पहुँच नै यदि दिनसके युवाहरूलाई स्वदेशमै राख्न सकिने बताएका छन्।

राष्ट्रिय घर निर्माण महोत्सवको उद्घाटन गर्दै उनले यस्तो बताएका हुन्।

उनले सरकारले न्यूनतम महत्वमा एउटा सानो घर, एउटा सवारी साधन र शिक्षा, स्वास्थ्यको सहज पहुँच पुर्‍याउनुपर्ने बताए।

उनले त्यसका लागि केही ऋण दिने व्यवस्था सरकारले गर्न जरूरी रहेको बताए।

नेपालमा बस्नु भन्ने तर बस्न सक्ने वातावरण बनाउन नसक्ने कुराले युवाहरू स्वदेशमा रहन नसक्ने उल्लेख गरे। यो नै नेपालको सुरूआती इकोनोमी ट्रान्सफर्मेसनको प्रस्थानबिन्दु बन्नुपर्ने बताए। आगामी सरकारले यस बारेमा काम गर्नुपर्ने बताए।

उनले भने, ‘नेपाली युवाहरूको सपना भनेको एउटा सानो घर, साधारण गाडी। बच्चालाई पढाउने शिक्षा, स्वास्थ्य सही रूपले दिनसक्यो भने त्यत्तिको लागि सरकारले बेसिक निडको रूपमा लिएर त्यसको लागि ऋण दिने, फेसिलिटेड गरिदिने र हरेक युवाले त्यत्तिको सपना पूरा गर्नसक्ने वातावरण बनाउन सक्यो भने सबै युवाहरू नेपालमै बस्ने सम्भावना रहन्छ। नेपालमा बस भन्ने तर यहाँको कुनै पनि जब क्रिएसन नहुने, त्यो अवसर, त्यो आशालाई पूरा गर्न नसक्ने अवस्थामा हामीले जतिसुकै भने पनि सम्भावना रहँदैन।’

उनले अगाडि भने, ‘त्यसको लागि सरकारले आगामी दिनमा युवाहरूको सपना भनेको नेपालमा रहनको लागि एउटा घर हुनुपर्छ। एउटा साधारण भेइकल हुनुपर्छ। शिक्षा, स्वास्थ्य सहज रूपमा पाउने वातावरण हुनुपर्छ। र मात्रै युवाहरू नेपालमै बस्नेछन्। त्यो अहिलेको सुरूआती नेपालको इकोनोमी ट्रान्सफर्मेसनको प्रस्थानबिन्दु हुनेछ। त्यसतर्फ आगामी सरकारले काम गर्नुपर्नेछ।’