नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (माओवादी) ले बुटवलमा मसाल जुलुस प्रदर्शन गर्ने क्रममा प्रहरीले तीन जनालाई पक्राउ गरेको छ।
उक्त पार्टीले अर्घाखाँचीको शितगंगा नगरपालिका वडा नम्बर ११ बोक्सेस्थित कम्युनबाट विस्फोटक पदार्थ बरामद गरी नष्ट गरेको विरोधमा शनिबार साँझ बुटवलमा मसाल जुलुस निकालेको थियो।
सो क्रममा नेपाल कम्युनिस्ट पार्टी निकट विद्यार्थी संगठन अखिल समाजवादीका तीन जना नेता पक्राउ परेका हुन्।
पक्राउ परेकाहरूमा अखिल समाजवादीका केन्द्रीय सचिवालय सदस्य पदम नेपाली ‘तुफान’, जिल्ला इन्चार्ज राजेश नेपाली ‘बारूद’ र रूपन्देही अध्यक्ष कुमार नेपाली ‘बिराट’ रहेको प्रहरीले जनाएको छ।
इलाका प्रहरी कार्यालय बुटवलका प्रमुख प्रहरी नायब उपरीक्षक इन्द्र रानाले रातिको समयमा मसाल जुलुस लिएर प्रदर्शन गरिरहेका उनीहरूलाई बुटवल राजमार्ग चौराहाबाट पक्राउ गरिएको जानकारी दिए।
पक्राउ परेका तीनै जनालाई अहिले इलाका प्रहरी कार्यालयमा राखिएको छ।
बुटवलको मिलनचोकबाट मसाल जुलुससहित सुरू भएको र्याली राजमार्ग चौराहामा पुगेर कोणसभामा परिणत भएको थियो। चौराहामा पुगेपछि प्रहरीले हस्तक्षेप गर्दै मसाल नियन्त्रणमा लिएको थियो।
कोणसभा समाप्त भई नेता तथा कार्यकर्ता आ–आफ्नो गन्तव्यतर्फ फर्किन थालेपछि प्रहरीले एक्कासि कार्यकर्तालाई नियन्त्रणमा लिएको जनाइएको छ। नियन्त्रण क्रममा नेकपा माओवादीका नेता–कार्यकर्ता र प्रहरीबीच केही समय झडपसमेत भएको थियो।
नेपाल कम्युनिस्ट पार्टी माओवादी रूपन्देहीले प्रहरीले अनावश्यक रूपमा बल प्रयोग गरेको भन्दै कडा आपत्ति प्रकट गरेको छ। पार्टीले गिरफ्तार गरिएका नेता–कार्यकर्तालाई तत्काल रिहा नगरे कडा आन्दोलनमा उत्रिने चेतावनी दिएको छ।
अर्घाखाँची प्रहरीले शुक्रबार बिहान गस्ती गर्ने क्रममा कोही नबस्ने गोठबाट भरूवा बन्दुक र ग्रिनेड लगायत विस्फोटक पदार्थ फेला पारेको जनाएको छ।
फेला परेका विस्फोटक पदार्थमा भरूवा बन्दुक दुई थान, ग्रिनेड १४ वटा, डेटोनेटर १२ वटा, लामो लन्चरजस्तो देखिने प्लास्टिकको पाइप ३ वटा, पाँच लिटरको प्रेसर कुकर बम एउटा, स्टिलको बम एउटा, बिजुलीको तार ४ बन्डल र ५ सय ग्राम बारूद छन्।
भरूवा बन्दुकबाहेक अन्य विस्फोटक पदार्थ नेपाली सेनाको सहयोगमा शुक्रबार नै डिस्पोज गरिएको थियो।
-1756794700.JPG)
-1746009348.jpg)
