अमेरिकी राष्ट्रपति डोनाल्ड ट्रम्प र युक्रेनी राष्ट्रपति भोलोदिमिर जेलेन्स्कीबीच भेटवार्ता भएको छ।
आइतबार फ्लोरिडाको मार-ए-लागो रिसोर्टमा ट्रम्प र जेलेन्स्कीबीच युक्रेनमा २० बुँदे शान्ति योजनाबारे छलफल भएको हो।
अरू विषयमा लगभग सहमत भए पनि जेलेन्स्कीले सुरक्षा प्रत्याभूति र जमिनको विषयमा भने ट्रम्पसँग प्रत्यक्ष छलफल गरी सहमति जुटाउन भनेर वाशिङ्टन पुगेका थिए।
भेटवार्तापछि राष्ट्रपति ट्रम्पले सहमतिको अत्यन्त नजिक पुगेको भनेर पत्रकारहरूलाई बताएका छन्।
त्यसबारेमा उनले विस्तृतमा भने नखुलाएको अन्तर्राष्ट्रिय समाचार संस्था रोयटर्सले जनाएको छ।
यद्यपि केही जटिल विषय भने अझे टुंगिन बाँकी रहेको दुवै राष्ट्रपतिले पत्रकार सम्मेलनमा बताएका छन्।
ट्रम्पले केही हप्ताभित्र वार्ता सफल हुने कि नहुने भन्ने सार्वजनिक प्रष्ट हुने बताए।
जेलेन्स्कीले भने युक्रेनका लागि सुरक्षा प्रत्याभूतिको विषयमा सहमति भइसकेको दाबी गरे। तर ट्रम्पले त्यसमा अझै पूर्ण सहमति नभई करिब ९५ प्रतिशत काम सकिएको भन्दै युरोपेली देशहरूले ठूलो भूमिका खेल्ने र अमेरिकाले समर्थन गर्ने बताए।
युद्धको सबैभन्दा संवेदनशील विषय मानिएको पूर्वी युक्रेनको डोनबास क्षेत्रको भविष्य अझै टुंगो लाग्न सकेको छैन।
रूसले युक्रेनी सेना डोनबासबाट पूर्ण रूपमा फिर्ता हुनुपर्ने अडान राख्दै आएको छ। जेलेन्स्कीले भने यस प्रस्तावलाई नरम बनाउने प्रयास गरिरहेका छन्। ट्रम्पले डोनबासको विषय कठिन भए पनि समाधानतर्फ अघि बढिरहेको बताए।
मार-ए-लागोमा जेलेन्स्की पुग्नुअघि ट्रम्प र रूसी राष्ट्रपति भ्लादिमिर पुटिनबीच फोनवार्ता भएको थियो।
ट्रम्पले उक्त संवादलाई 'उत्पादक' भनेका छन् भने क्रेमलिनका अधिकारीले वार्तालाई 'मैत्रीपूर्ण' भएको बताएका छन्। रूसी पक्षले युरोपियन युनियन र युक्रेनले प्रस्ताव गरेको ६० दिने युद्धविरामले युद्ध लम्ब्याउने दाबी पनि गरेको छ।
यसैबीच, शनिबार रूसले किभसहित युक्रेनका विभिन्न क्षेत्रमा सयौं ड्रोन र मिसाइल आक्रमण गरेको थियो।
आक्रमणका कारण राजधानी कीभका केही भागमा बिजुली र ताप प्रणाली अवरुद्ध भएको छ।
जेलेन्स्कीले यी आक्रमणलाई अमेरिकी मध्यस्थतामा भइरहेको शान्ति प्रयासको जवाफ भनेका छन्। तर ट्रम्पले पुटिन र जेलेन्स्की दुवै शान्तिप्रति गम्भीर रहेको विश्वास व्यक्त गरे।
रूसले पछिल्ला महिनाहरूमा युद्धमैदानमा अग्रता बढाएको दाबी गर्दै आएको छ। रूसी अनुमानअनुसार हाल उसले युक्रेनको करिब १२ प्रतिशत भूभाग नियन्त्रणमा लिएको छ, जसमा डोनबासको ठूलो हिस्सा पनि पर्छ। युक्रेन भने हालको युद्धरेखा कायम राख्न चाहन्छ।
अमेरिकाले सम्भावित सम्झौताका रूपमा डोनबास क्षेत्रलाई ‘फ्रि इकोनोमिक जोन’ बनाउने प्रस्ताव पनि अघि सारेको छ।
त्यस्तै जापोरिज्जिया आणविक विद्युत् केन्द्र साझा रूपमा सञ्चालन गर्ने प्रस्तावमाथि पनि छलफल भइरहेको छ।
युक्रेन युद्ध समाधानका लागि पछिल्ला हप्ताहरूमा कूटनीतिक गतिविधि तीव्र बनेका छन्।
युरोपेली मुलुकहरूले युद्धपछिको सुरक्षा संरचना तय गर्न प्रयास गरिरहेका छन्, जसलाई अमेरिकाले समर्थन गर्ने संकेत दिएको छ।
-1756794700.JPG)
-1746009348.jpg)
