बंगलादेशमा एक हिन्दु युवाको हत्यालाई लिएर भारत र बंगलादेशबीच तनाव बढ्दो छ।
गत साता भारतीय विदेश मन्त्रालयका प्रवक्ता रणधीर जयसवालले बंगलादेशको मैमनसिंहमा दिपुचन्द्र दासको हत्या भएको घटना उल्लेख गर्दै त्यसको निन्दा गरेका थिए।
भारतीय विदेश मन्त्रालयले जारी गरेको बयानमा बंगलादेशमा हिन्दु, क्रिश्चियन, बौद्ध लगायत अल्पसंख्यकहरूको सुरक्षाबारे चिन्ता व्यक्त गरिएको बिबिसीले जनाएको छ।
यसैको जबाफमा आइतबार बंगलादेशले भारतको उक्त बयान खारेज गर्दै त्यसलाई 'लक्षित टिप्पणी' भनेको छ।
भारतको भनाइले आफ्नो वास्तविक अवस्था प्रतिबिम्बित नगर्ने बंगलादेशको विदेश मन्त्रालयले जनाएको छ।
भारतीय प्रवक्ताले बंगलादेशमा अल्पसंख्यकहरूको सुरक्षालाई लिएर उदाहरणका रूपमा प्रस्तुत गरेका दिपुचन्द्र दास आपराधिक गतिविधिमा संलग्न रहेको विदेश मन्त्रालयले भनेको छ।
बंगलादेशको मैमनसिंह जिल्लाको भालुका क्षेत्रमा 'धर्मको अपमान' गरेको आरोपमा एक हिन्दु युवकलाई भिडले कुटेर हत्या गरेको घटना सार्वजनिक भएको थियो। स्थानीय प्रहरी स्टेसनका ड्युटी अफिसर रिपोन मियाँका अनुसार ती युवकलाई कुटेर हत्या गरी उनको शव रूखमा बाँधेर आगो लगाइएको थियो।
बंगलादेश अन्तरिम सरकारका प्रमुख सल्लाहकार मोहम्मद युनुसले उक्त घटनाको निन्दा गर्दै 'नयाँ बंगलादेशमा यस्ता हिंसाका लागि कुनै ठाउँ छैन' भनेका थिए। उनले अपराधीहरूलाई कडा सजाय दिइने पनि बताएका थिए।
त्यसलगत्तै भारतको राजधानी नयाँदिल्लीस्थित बंगलादेश दूतावास अगाडि भएको प्रदर्शनपछि दुवै देशबीच तनाव बढेको थियो।
भारतले उक्त प्रदर्शनबारे केही बंगलादेशी मिडियामा 'भ्रामक प्रचार' गरिएको दाबी गरेको छ। बंगलादेशले पनि यस्तो प्रदर्शनलाई 'भ्रमपूर्ण प्रचार' भन्दै खारेज गर्नु मात्र पर्याप्त नभएको भन्दै यसबाट दुई देशको सम्बन्धमा असर पर्ने बताएको छ।
बंगलादेशी विदेश मन्त्रालयका प्रवक्ता एसएम महबूबुल आलमले बंगलादेशमा अल्पसंख्यकहरूको स्थितिसम्बन्धी भारतको बयानको जबाफमा पत्रकार सम्मेलन पनि गरेका छन्।
उनले भनेका छन्, 'भारतको बयानले बंगलादेशको वास्तविक अवस्था प्रस्तुत गर्दैन। बंगलादेश सरकार यस्तो गलत, बढाइचढाइ गरिएको वा जानाजानी तोडमोड गरिएको कथालाई पूर्ण रूपमा अस्वीकार गर्छ। यसले बंगलादेशमा धार्मिक र साम्प्रदायिक सद्भावको लामो परम्परालाई विकृत रूपमा देखाउन खोजेको छ।'
उनका अनुसार दिपुचन्द्र दासको मृत्यु त्यस बेला भएको हो, जब उनी आफ्नै मुस्लिम साथीबाट पैसा उठाइरहेका थिए। उनलाई पछि प्रहरीले पक्राउ गरेको थियो। यो घटनालाई अल्पसंख्यकविरूद्धको कदमका रूपमा प्रस्तुत गर्नु भ्रामक भएको बंगलादेशी विदेश मन्त्रालयले भनेको छ।
'भारतमै पनि हालै अल्पसंख्यकमाथि भएका केही घटना चिन्ताजनक छन्,' प्रवक्ता आलमले भने, 'भारतमा मुसलमान, क्रिश्चियन लगायत विभिन्न अल्पसंख्यकमाथि भइरहेका क्रूर हत्या, दुर्व्यवहार, मनपरी गिरफ्तारी र धार्मिक कार्यक्रममा हस्तक्षेपप्रति हामी निकै चिन्तित छौं।'
उनले अगाडि भने, 'गत साता क्रिसमस समारोह क्रममा भारतभर क्रिश्चियन समुदायमाथि भएका सामूहिक हिंसाबारे बंगलादेश गम्भीर रूपले चिन्तित छ। हामी यसलाई घृणा–अपराध र लक्षित हिंसा मान्छौं।'
उता भारतीय विदेश मन्त्रालयका प्रवक्ता रणधीर जयसवालले पनि भारतले बंगलादेशको अवस्थाप्रति 'नजिकबाट निगरानी' गरिरहेको उल्लेख गर्दै हिन्दु, क्रिश्चियन, बौद्ध लगायत अल्पसंख्यकमाथि भइरहेको 'शत्रुतापूर्ण व्यवहार' प्रति गम्भीर चिन्ता व्यक्त गरेका छन्।
भारतले बंगलादेशमा अन्तरिम सरकार गठन भएयता अल्पसंख्यकमाथि हिंसाका २ हजार ९०० भन्दा बढी घटना दर्ज भएको दाबी गरेको छ।
'यी घटनालाई केवल मिडियाको बढाइचढाइ वा राजनीतिक हिंसा भनेर खारेज गर्न मिल्दैन,' जयसवालले भने।
यसबीच बंगलादेशमा पछिल्लो समय विद्यार्थी नेता शरीफ उस्मान हादीको गोली हानेर हत्या गरिएपछि हिंसात्मक घटनाहरू बढेका छन्। उनी सन् २०२४ मा शेख हसिनालाई सत्ताबाट हटाउने विद्रोहका लोकप्रिय नेतामध्ये एक थिए।
ढाका महानगरीय प्रहरीले उनको हत्या गर्ने दुई आरोपी फैसल करिम मसूद र आलमगीर शेख भारत भागेको दाबी गरेको छ। उनीहरूले भारतको पूर्वोत्तर राज्य मेघालयमा शरण लिइरहेको बंगलादेशको दाबी छ।
तर यस विषयमा भारत सरकारले वा मेघालय सरकारले कुनै प्रतिक्रिया दिएको छैन।
-1756794700.JPG)
-1746009348.jpg)
