नेपाली कांग्रेसको दोस्रो विशेष महाधिवेशनले नयाँ नेतृत्व चयनको कार्यविधि पारित गरेपछि सभापति शेरबहादुर देउवाले आफू निकटका पदाधिकारी तथा नेताहरूलाई बोलाएर छलफल गरिरहेका छन्।
त्यस क्रममा सभापतिले दुवै महामन्त्रीलाई बोलाएर छलफल गर्नुपर्ने विषयमा कुराकानी भइरहेको नेता रामहरि खतिवडाले जानकारी दिए।
'सभापतिज्यू पार्टीलाई एकताबद्ध बनाएर लैजाने कोसिसमै हुनुहुन्छ। त्यसैका लागि शेखर कोइराला, मिनेन्द्र रिजाल लगायतका नेताहरू भर्खरै उहाँलाई भेटेर जानुभयो,' देउवा निवास बाहिर पत्रकारहरूसँग कुरा गर्दै खतिवडाले भने, 'सभापतिज्यूले दुवै महामन्त्रीलाई बोलाएर छलफल गर्नुपर्ने विषयमा कुरा भइरहेको छ। आफ्नै पालामा फेरि पार्टी फुटाउने सभापतिको चाहना छैन।'
सभापति देउवा र कार्यवाहक सभापति पूर्णबहादुर खड्कासँग निकट रहँदै आएका खतिवडाले पार्टी एकता टुट्न नदिन सोमबार ९० जनाभन्दा बढी केन्द्रीय सदस्यले देउवासँग छलफल गरेको जानकारी दिए।
'हामी सबै एकताको पक्षमा छौं। कसैले पनि मेरो गोरूको बाह्रै टक्का नगरौं भन्नेमा हाम्रो जोड छ,' उनले भने, 'सहमतिको बाटो खोज्न शेखर कोइरालाले पनि महामन्त्री विश्वप्रकाश शर्मासँग कुरा भइरहेको छ भन्नुभयो। गगनजीसँग पनि संवाद भइरहेको छ। दुवै महामन्त्रीसँग संवाद गरेर केही न केही बाटो खोजेर जाने पक्षमा छौं।'
उनले अगाडि भने, 'मलाई धेरै साथीहरूले विशेष महाधिवेशन स्थलमा तिम्रो अनुहार किन देखिएन भनेर सोधिरहनुभएको छ। मलाई अहिलेको अवस्थामा त्योभन्दा पार्टीको एकता कायम राख्नु महत्त्वपूर्ण लागेको छ। म त्यसैको प्रयासमा छु।'
विशेष महाधिवेशनमा गएर सम्बोधन गरी पार्टी एकता हुन्छ भने त्यसका लागि पनि आफूले प्रयास गरिरहेको उनले बताए।
विशेष महाधिवेशन नेतृत्व चयनमा अघि बढेपछि देउवा–शेखर पक्ष गगन–विश्वसँग संवादमा
नेपाली कांग्रेसको दोस्रो विशेष महाधिवेशन नेतृत्व परिवर्तन गर्ने बाटोमा अघि बढेपछि सभापति शेरबहादुर देउवा र नेता शेखर कोइराला पक्षले महामन्त्रीद्वय गगन थापा र विश्वप्रकाश शर्मासँग संवाद अघि बढाएका छन्।
भृकुटीमण्डपमा जारी विशेष महाधिवेशनको बन्द सत्रले सोमबार देउवा नेतृत्वको कार्यसमितिको म्याद समाप्त भएको निष्कर्ष निकाल्दै पन्ध्रौं महाधिवेशनसम्मका लागि नेतृत्व चयन गर्ने प्रक्रिया अघि बढाउने कार्यविधि पारित गरेको छ।
बहुमत प्रतिनिधिहरू सहभागी विशेष महाधिवेशन नेतृत्व चुन्ने प्रक्रियामा अघि बढेपछि देउवा र कोइरालाले महामन्त्रीद्वयसँग संवाद बढाएका हुन्।
शेखर कोइरालाले सोमबार बिहानै आफू निकटका पदाधिकारी र कानुन व्यवसायीसँग छलफल गरेका थिए। त्यसपछि उनी निकटका नेताहरूले महामन्त्री विश्वप्रकाशसँग संवाद गरेको स्रोत बताउँछ।
एक नेताका अनुसार विशेष महाधिवेशनलाई नीति महाधिवेशन र संकल्प प्रस्ताव पारित गरेर मात्र जाने अवस्था बनाउन सकिनेबारे कोइरालाले कुरा गरेका थिए।
'विश्वजीले के विषयमा सहमति गर्ने भन्नेबारे अर्का महामन्त्रीसँग छलफल गरेर फेरि कुरा गर्ने बताउनुभयो,' ती नेताले सेतोपाटीसँग भने, 'उहाँहरू बन्द सत्रमै हुनुहुन्छ। सकिएपछि फेरि कुरा गर्ने प्रयास गर्छौं।'
त्यसपछि शेखरसहितको टोली देउवालाई भेट्न उनकै निवास महाराजगन्ज पुगेको थियो।
त्यहाँ पुगेर उनीहरूले एकता कायम राख्न विशेष महाधिवेशन पक्षसँग आफूहरूले गरेको कुराकानीबारे देउवालाई ब्रिफिङ गरेका थिए।
सभापति देउवाले गगन-विश्वसँग अन्य माध्यमबाट आफ्नो कुराकानी भइरहेको शेखर लगायत त्यहाँ पुगेका नेताहरूलाई जानकारी दिएका थिए।
'मेरो कुरा भइरहेको छ। बाँकी छलफल गर्दै गरौंला भन्नुभयो,' ती नेताले देउवाको भनाइ उद्धृत गर्दै भने।
शेखर कोइराला पक्षका नेता बद्री पाण्डेले दुवै पक्षसँग संवाद भएको पुष्टि गरेका छन्।
'शेखर दाइ लगायत हामी दिनभरि पार्टीलाई एकताबद्ध गर्ने मिलन विन्दु पहिल्याउन संवाद गर्यौं। अहिलेसम्म ठोस प्रगति भएको छैन,' उनले भने।
विशेष महाधिवेशनको बन्द सत्रमा महामन्त्रीद्वय गगन थापा र विश्वप्रकाश शर्माले प्रस्तुत गरेको प्रतिवेदनमाथि छलफल चलिरहेको छ।
छलफलपछि हलको निष्कर्ष अनुसार नेतृत्व चयन गर्ने कि नीति र संकल्प प्रस्ताव पारित मात्र गर्ने भन्ने निर्क्योल गर्नेछ।
नेतृत्व नै परिवर्तन गर्ने अवस्थामा विशेष महाधिवेशन मंगलबारसम्म लम्बिने छ। निर्वाचन कार्यक्रम पनि मंगलबार नै हुनेछ।
-1746009348.jpg)
