राष्ट्रिय स्वतन्त्र पार्टी (रास्वपा) का सहमहामन्त्री विपिनकुमार आचार्यले विधिको विकल्प भनेको थप वैज्ञानिक विधि नै भएको बताएका छन्।
समानुपातिक निर्वाचन प्रणालीका लागि उम्मेदवार छनोट गर्दा त्यसको रूपरेखा तयार पारेका आचार्यले बन्दसूचीमा रास्वपाको तर्फबाट नाम समावेश गर्दा विधिको पालना गरिएको बताएका छन्।
प्रत्यक्षतर्फ उम्मेदवार बन्न आफूले पनि आवेदन दिएको बताउँदै आफू प्रतिस्पर्धाबाटै अगाडि आउन चाहेको बताएका छन्।
‘मैले केही दिन अगाडि पनि भनेको थिएँ—समानुपातिक निर्वाचन प्रणालीका बेला समायोजनको चटारो थियो, त्यो विशेष परिस्थिति थियो। अब सबै जना राष्ट्रिय स्वतन्त्र पार्टीका सदस्यहरू हुन्, त्यसैले अब उम्मेदवारको छनोट भागबण्डा र नेतृत्वको खल्तीबाट होइन, विधि, क्षमता र पारदर्शिताकै जगमा हुनुपर्छ। पार्टीको संगठनदेखि नयाँ जोडिने साथीहरू सबैलाई समेट्ने गरी, सबैको सर्वस्वीकार्यता हुने गरी र कसैलाई पनि अन्याय नहुने गरी एउटै छनोट प्रक्रियाबाट उम्मेदवार छनोट गर्नुपर्छ। विधिको विकल्प भनेको थप वैज्ञानिक विधि नै हो,’ उनले भनेका छन्।
पुराना पार्टी नै राष्ट्रिय स्वतन्त्र पार्टीले इनिसिएट गरेको प्रारम्भिक निर्वाचन, ल्याटरल इन्ट्री, मेरिटोक्रेसी अवलम्बन गर्छौं भनिरहँदा रास्वपाले आफूले तय गरेको विधिमा अडिनुपर्ने धारणा राखेका हुन्।
‘पुराना पार्टी नै राष्ट्रिय स्वतन्त्र पार्टीले इनिसिएट गरेको प्रारम्भिक निर्वाचन, ल्याटरल इन्ट्री, मेरिटोक्रेसी अवलम्बन गर्छौं भनेर भन्दै गर्दा राष्ट्रिय स्वतन्त्र पार्टी चाहिँ पार्टीको आधारभूत डिएनए (मेरिटोक्रेसी, पारदर्शिता, प्रारम्भिक निर्वाचन, ल्याटरल इन्ट्री, समता) फालेर उम्मेदवार छनोट गर्ने कर्मकाण्डी प्रक्रियामा गयो भने त्यसले पार्टीलाई कालान्तरमा असर त गर्छ नै, पुराना र नयाँको फरक पनि बिस्तारै मेटिन्छ। पार्टीले नै विधि मानेन भने देश विधिमा चल्छ भन्नु दिवा स्वप्न मात्र हो,’ उनले भनेका छन्।
त्यस्तै उनले आफूलाई नेतृत्वले विशेषाधिकार प्रयोग गरेर समानुपातिकमा राख्ने भन्दा पनि विधिमार्फत् जाँचिएर अग्रस्थानमा बसेको र अहिले फिर्ता लिएर प्रत्यक्षतर्फ अघि बढेको बताएका हुन्।
‘पार्टी नेतृत्वले केन्द्रका सबै साथीहरू प्रत्यक्ष लड्न मिल्दैन, केन्द्रमा बसेर पार्टीको क्याम्पेन सम्हाल्नुपर्छ, त्यसैले अहिलेका लागि तपाईंले प्रत्यक्ष लड्न पाउनु हुँदैन,तपाईंका हकमा पार्टीले विशेषाधिकार प्रयोग गर्छ, तपाईं समानुपातिक बन्द सूचीको एक नम्बरमा बस्नुस् भन्ने अफरलाई लत्याएर, होइन म विधिबाटै आउँछु; प्रारम्भिक निर्वाचन र लिडरशिप एकेडेमी र पोलिटिकल प्रोक्सिमिटीको ओभरअल मार्किङमा अब्बल हुन्छु भन्ने आत्मविश्वासका साथ छनोट समितिको प्रमुखबाट राजीनामा दिएर साधारण सदस्यझैँ सम्पूर्ण प्रक्रियामा सहभागी भएर मेरिटमा एक नम्बरमा आएको व्यक्ति हुँ। यो कुराको सदैव मलाई गौरव रहनेछ,’ उनले भनेका छन्।
समानुपातिक बन्द सूचीसँग जोडिएका विभिन्न अवयवहरूमा मेरो प्रष्ट धारणा म सही समयमा राख्ने उनले बताएका छन्।
बालेन शाहको समूहबाट आएकाहरूको हकमा समानुपातिकमा सिधै समायोजन गर्नुपर्ने स्वाभाविक बाध्यता रहेकाले केही नमिलेको हुन सक्ने उनले बताएका छन्।
‘जसलाई प्रक्रियामा सहभागी साथीहरूलाई बुझिदिनुभएकोमा धन्यवाद। प्रक्रियामा राष्ट्रिय स्वतन्त्र पार्टीबाट सहभागी ४१८ जना मध्यबाट बन्द सूचीमा पर्नुभएका साथीहरूको हकमा फाउल प्ले भएको छैन भन्ने कुरालाई पार्टी नेतृत्वले पारदर्शी रूपमा सही समयमा प्रस्ट्याउने नै छ। पार्टीको बन्दसूची आधिकारिक रूपमा बाहिर नआउँदै, पार्टीले हरेक उम्मेदवारको मार्किङलाई पब्लिक नगर्दै, शंका भरमा कुनै पनि धारणा व्यक्त नगरिदिनुहोला,’ उनले भनेका छन्।
-1746009348.jpg)
