नेपाली कांग्रेसको विशेष महाधिवेशनको मनोनयनका लागि साँझ साढे ७ बजेसम्म मात्रै समय तोकिएको छ।
मंगलबार साढे ६ बजेदेखि साढे ७ बजेसम्म उम्मेदवारी दर्ताका लागि समय तोकिएको निर्वाचन समितिका संयोजक सीताराम केसीले जानकारी दिए।
उक्त समयपछि मनोनयन दर्ताका लागि समय नथपिने पनि उनले बताए।
त्यस्तै, मतदान बेलुकी नै हुने भनिएको थियो। तर मतदानको कार्यक्रम भोलिका लागि स्थगित गरिएको छ।
मतदान र बाँकी कार्यक्रम भोलिदेखि हुने केसीले बताए।
नेपाली कांग्रेसको विशेष महाधिवेशनस्थलबाट चार जनाले सभापति उम्मेदवारको फारम लगेका छन्।
क-कसका लागि उक्त फारम लगिएको हो भन्ने यकिन भने छैन।
त्यस्तै, पदाधिकारीको अरू पदका लागि पनि ३० वटा फारम लगिएको छ।
सभापतिमा उम्मेदवारी दिन ३० हजार रूपैयाँ शुल्क तोकिएको छ।
केन्द्रीय उपसभापति र महामन्त्रीका लागि समान २५ हजार रूपैयाँ शुल्क निर्धारण भएको छ।
त्यस्तै, सहमहामन्त्री पदका लागि २० हजार रूपैयाँ शुल्क तोकिएको केन्द्रीय निर्वाचन समितिका संयोजक सीताराम केसीले जानकारी दिए।
केन्द्रीय सदस्य पदका लागि भने १० हजार रूपैयाँ शुल्क तोकिएको छ। मनोनयनको फारम लग्दा शुल्क बुझाउनु नपर्ने भए पनि दर्ता गर्दा भने दस्तुर बुझाउनुपर्नेछ।
-1746009348.jpg)
