काठमाडौं महानगरपालिकाका मेयर बालेन शाहलाई महोत्तरीमा रहेका उनका आफन्त एवम् राष्ट्रिय स्वतन्त्र पार्टीका नेता कार्यकर्ताहरूले त्यहीँबाट चुनाव लड्न आग्रह गरेका छन्।
आफ्नै सचिवालयमा रहेका कुमार बेनको ज्वागलस्थित घरलाई छलफलको थलो बनाइरहेका बालेनलाई मंगलबार आफन्त एवम् पार्टीका नेता कार्यकर्ताले अन्यत्र क्षेत्र नखोज्न भनेका हुन्। मेयर बालेन शाहको पुर्ख्यौली घर महोत्तरीको एकडारा गाउँपालिका हो। त्यहाँ उनको घर रहे पनि परिवारका सदस्य बसोबास भने गर्दैनन्।
काठमाडौं महानगरपालिकाको मेयरबाट यही माघ ४ गते राजीनामा दिएर प्रतिनिधि सभा उम्मेदवार बन्ने तयारी गरिरहेका बालेन झापा–५ बाट उठ्ने तयारी गरिरहेका छन्।
‘महोत्तरीबाट आउनु भएको आफन्तले भेटेर महोत्तरी–३ बाट चुनाव लड्न भन्नुभएको छ। उहाँहरूले जिल्लाको वस्तुस्थिति पनि बताउनुभयो,’ मेयर बालेनका एक सचिवालय सदस्यले भने।
रास्वपाको दोस्रो वरीयताको वरिष्ठ नेता भए पनि मेयर बालेन पार्टी कार्यालय गएका छैनन्। ज्वागलमै बसेर छलफल, भेटघाट र अन्तरक्रिया गरिरहेका छन्। बालेन शाह यही माघ ५ गते जनकपुर पनि जाँदैछन्। त्यहाँ उनी पहिलोपटक पार्टीको ब्यानरमा आयोजना हुने कार्यक्रममा सरिक हुँदैछन्। त्यहीँबाट उनी चुनावी कार्यक्रममा होमिने तयारी पनि भइरहेको रास्वपाले जानकारी दिएको छ।
-1768351614.jpg)
-1746009348.jpg)
