नेपाली कांग्रेसको विशेष महाधिवेशनको मनोनयनका दर्ताका लागि पुनः समय थप गरिएको छ।
मंगलबार दिउँसो २ बजेदेखि ३ बजेसम्म मनोनयन दर्ताको समय तोकिएकोमा पटक पटक थप गरी बेलुकी ७ बजेसम्म मनोनयन दर्ताको समय निर्धारण गरिएको थियो।
मंगलबार नै बेलुकी ९ बजेदेखि बुधबार बिहान १ बजेसम्म मतदानको समय तय गरिएको थियो।
केन्द्रीय निर्वाचन समिति संयोजक सीताराम केसीले मंगलबार अबेर विज्ञप्ती जारी गरी निर्वाचन कार्यक्रम अन्तर्गत मनोनयन दर्ता बुधबार पनि जारी हुने जानकारी गराएका हुन्।
उनका अनुसार बुधबार बिहान सवा ८ बजेदेखि सवा ९ बजेसम्म मनोनयन दर्ताको समय थप गरिएको हो।
निर्वाचन अन्तर्गत अन्य कार्यक्रम भने तय हुन बाँकी नै छ।
मंगलबार नै चार जनाले सभापति उम्मेदवारको फाराम लगेका थिए।
क-कसका लागि उक्त फाराम लगिएको हो भन्ने यकिन भने छैन।
त्यस्तै, पदाधिकारीको अरू पदका लागि पनि ३० वटा फाराम लगिएको छ।
सभापतिमा उम्मेदवारी दिन ३० हजार रूपैयाँ शुल्क तोकिएको छ।
केन्द्रीय उपसभापति र महामन्त्रीका लागि समान २५ हजार रूपैयाँ शुल्क निर्धारण भएको छ।
त्यस्तै, सहमहामन्त्री पदका लागि २० हजार रूपैयाँ शुल्क तोकिएको केन्द्रीय निर्वाचन समितिका संयोजक सीताराम केसीले जानकारी दिए।
केन्द्रीय सदस्य पदका लागि भने १० हजार रूपैयाँ शुल्क तोकिएको छ। मनोनयनको फाराम लैजाँदा शुल्क बुझाउनु नपर्ने भए पनि दर्ता गर्दा भने दस्तुर बुझाउनुपर्नेछ।
-ink-1768294967.jpeg)
-1746009348.jpg)
