नेपाली कांग्रेसका सभापति शेरबहादुर देउवासँग कुरा नमिलेपछि महामन्त्रीद्वय गगन थापा र विश्वप्रकाश शर्माले कानुनविदहरूसँग छलफल अघि बढाएका छन्।
विशेष महाधिवेशनले नयाँ नेतृत्व चयन गरेपछि निर्वाचन आयोगमा अद्यावधिक गर्नुपर्ने हुँदा यसबारे कानुनी परामर्श लिन महामन्त्रीद्वयले कानुनविदहरूसँग छलफल गरेका हुन्।
उनीहरूले देउवा निवास महाराजगन्जबाट निस्केपछि कानुनविदहरूसँग छलफल गरेको स्रोतले बतायो।
विशेष महाधिवेशनले गर्ने नेतृत्व चयन र निर्वाचन आयोगमा हस्ताक्षर अद्यावधिक गर्ने लगायत विषयमा कुराकानी गर्न महामन्त्रीद्वयले छलफल गरेका हुन्।
यसबीच विशेष महाधिवेशन स्थल भृकुटीमण्डपमा निर्वाचन प्रक्रिया अघि बढिसकेको छ। बुधबार बिहान ११ बजेसम्म मनोनयन फारम वितरण र उम्मेदवारी दर्ता कार्यक्रम सकिएको छ।
सबै पदमा उम्मेदवारी परेको निर्वाचन समितिका संयोजक सीताराम केसीले जानकारी दिए।
'मनोनयन फारम वितरण र उम्मेदवारी दर्ताको सबै कार्यक्रम ११ बजे सकियो। सबै पदमा उम्मेदवारी परेको र दिउँसो १ बजे उम्मेदवारको नामावली प्रकाशन तयारी छ,' उनले भने, 'सकेसम्म सर्वसम्मत गर्ने कुरा छ, यो राजनीतिक पाटो भयो।'
सभापतिमा उम्मेदवारी दिन ३० हजार रूपैयाँ शुल्क तोकिएको छ।
केन्द्रीय उपसभापति र महामन्त्रीका लागि समान २५ हजार रूपैयाँ शुल्क निर्धारण भएको छ।
त्यस्तै, सहमहामन्त्री पदका लागि २० हजार रूपैयाँ शुल्क तोकिएको छ।
केन्द्रीय सदस्य पदका लागि भने १० हजार रूपैयाँ शुल्क तोकिएको छ। मनोनयनको फाराम लैजाँदा शुल्क बुझाउनु नपर्ने भए पनि दर्ता गर्दा भने दस्तुर बुझाउनुपर्नेछ।
-1746009348.jpg)
