राष्ट्रिय स्वतन्त्र पार्टी (रास्वपा) समानुपातिकको बन्दसूचीमा रहेकी टासी ल्हाजोमको नाम हटाइएको छ।
रास्वपाले उनको नाम बन्दसूचीबाट हटाएको हो।
हुम्लाकी जलवायु अभियानी ल्हाजोम जेनजी आन्दोलनपछि रास्वपा प्रवेश गरेकी थिइन्। उनको यसअघि मन्त्रीमा पनि नाम चर्चामा थियो। त्यतिबेला मन्त्री बन्न रोकिएकी ल्हाजोम रास्वपाको आन्तरिक प्रतिस्पर्धाबाट आदिवासी जनजाति क्लस्टरतर्फ तेस्रो मत प्राप्त गर्दै सूचीमा समेटिएकी थिइन्।
मंगलबार नेताहरूसँग छलफल गरेर ल्हाजोमले नाम फिर्ता लिएको रास्वपा प्रवक्ता मनिष झाले बताए।
‘उहाँले आफै नाम फिर्ता लिनुभएको हो। म तत्काल सांसद बन्दिनँ। समुदायका लागि काम गर्छु। आयोग, नियोगतिर काम गर्छु भन्नुभयो,’ प्रवक्ता झाले भने, ‘सल्लाह गरेरै नाम फिर्ता लिनुभएको हो।’
यसबारे हामीले सूचीमा रहेकी टासी ल्हाजोमलाई पनि सोध्यौं।
उनले नेतृत्वले आफूसँग कुनै सल्लाह नगरेको बताइन्। यसबारे आफूलाई थाहा नभएको भन्दै उपसभापति डिपी अर्याललाई (डोलप्रसाद) लाई सोध्न आग्रह गरिन्।
‘मलाई समानुपातिक सूचीबाट हटाइएको हो भने यसबारे डिपी अर्यालसँग कुरा गर्नुहोस् न है। मलाई सोधिएको छैन। मसँग कुरा पनि भएको होइन,’ उनले सेतोपाटीसँग भनिन्।
-1746009348.jpg)
