नेपाली कांग्रेसले दुई महामन्त्री गगन थापा र विश्वप्रकाश शर्मा तथा सह-महामन्त्री फरमुल्लाह मन्सुर बाहेक विशेष महाधिवेशनमा लागेका अन्य पदाधिकारी तथा केन्द्रीय सदस्यहरूलाई फर्कन आग्रह गरेको छ।
केन्द्रीय समिति बैठकको निर्णय सुनाउँदै प्रचार विभाग प्रमुख मीन विश्वकर्माले महामन्त्रीद्वय गगन-विश्व र सहमहामन्त्री फरमुल्लाह मन्सुरलाई पार्टीको साधारण सदस्यसमेत नरहने गरी निष्कासन गरिएको जानकारी दिए।
'कांग्रेसको विधान २०१७ (संशोधनसहित) धारा ५० (५) उल्लेख भए बमोजिमको व्यवस्था समेतको आधारमा धारा २२ को उपधारा २० तथा धारा २४ को उपधारा ८ को देहाय खण्ड 'घ' र 'ङ' बमोजिम नेपाली कांग्रेसको साधारण सदस्य समेत नरहने गरी आजका मितिबाट लागु हुने गरी पार्टीबाट निष्कासन गरिएको छ,' दुई महामन्त्री र एक सहमहामन्त्रीको नाम लिँदै प्रचार विभाग प्रमुख विश्वकर्माले भने।
बैठकले अन्य पदाधिकारी र केन्द्रीय सदस्यहरूलाई भने पार्टीमा फर्कन आह्वान गरेको छ।
'आकर्षणमा, लहैलहैमा लागेर पार्टी हितविपरीत कार्य गर्ने अन्य पदाधिकारी र सदस्यहरूलाई पार्टीको अनुशासन सम्झेर, जिम्मेवारी सम्झेर र राष्ट्रिय राजनीतिको विषम परिस्थितलाई मध्यनजर गर्दै पार्टीमा फर्कन र नियमित रूपले काम गर्न हार्दिक अपिल गर्ने निर्णय गरेको छ,' उनले भने।
कारबाही गरिएकाको हकमा सम्बन्धित व्यक्तिले स्पष्टीकरण दिन सक्ने पनि प्रचार विभाग प्रमुख विश्वकर्माले बताए।
'कारबाही फुकुवा गर्नका लागि सम्बन्धित व्यक्तिले कारण खुलाएर स्पष्टीकरण अथवा विभिन्न ढंगबाट पुनरावदेन गरे केन्द्रीय कार्यसमितिले सुनुवाइ गर्न सक्छ,' उनले भने।
आजको बैठकले केन्द्रीय कार्यसम्पादन समितिले गरेको सम्पूर्ण निर्णय अनुमोदन पनि गरेको छ।
-ink-1756274533.jpeg)
-1746009348.jpg)
