नेपाली कांग्रेसले फागुन २१ मा हुने प्रतिनिधि सभा निर्वाचनका लागि घोषणा पत्र लेख्दैछ।
पार्टीका नेता तथा कार्यकर्ता र विभिन्न विषयगत क्षेत्रहरूबाट सुझाव लिएर कांग्रेसले घोषणा पत्र लेखिरहेको हो।
घोषणा पत्र माघ अन्तिम साता सार्वजनिक गर्ने तयारी छ।
विशेष महाधिवेशनबाट निर्वाचित भएपछि बसेको पहिलो केन्द्रीय कार्यसमिति बैठकले घोषणा पत्र र निर्वाचन परिचालन समिति गठन गर्ने निर्णय गरेको थियो।
माघ १ गते बसेको केन्द्रीय समिति बैठकले ती दुई समिति गठन गरेको थियो भने दुवै समितिले आ-आफ्नो क्षेत्रमा काम गरिरहेका छन्।
कांग्रेसले सभापति गगन थापा संयोजक रहने गरी घोषणा पत्र लेखन समिति र उपसभापति विश्वप्रकाश शर्मा संयोजक रहने गरी केन्द्रीय निर्वाचन परिचालन समिति गठन गरेको थियो।
प्रवक्ता देवराज चालिसेले घोषणा पत्र लेखनको काम भइरहेको जानकारी दिए।
‘केन्द्रीय समितिले सभापतिज्यूकै नेतृत्वमा घोषणा पत्र लेखन समिति गठन गरेको छ र काम भइरहेको छ, विभिन्न क्षेत्रबाट सुझाव संकलन गरिएको छ,’ उनले सेतोपाटीसँग भने, ‘भिजन १० मा केन्द्रित रहेर घोषणा पत्र लेख्दैछौं।’
उनकाअनुसार पार्टीले सुशासन र विकासलाई प्राथमिकतामा राखेको छ।
मुलुकको यथार्थ अवस्था चित्रण गर्दै सुशासन, विकास र व्यवहारिक कार्ययोजनालाई मुख्य आधार बनाएर घोषणा पत्र तयार गरिने पनि उनले जानकारी दिए।
विगतमा घोषणा पत्र लेखनमा योगदान पुर्याएका विभिन्न क्षेत्रका विज्ञहरूका सुझावसमेत लिएर घोषणा पत्र लेखन कार्य भइरहेको हो।
यसपालिको घोषणापत्र केबल आकांक्षा र प्रतिबद्धतामा सीमित नहुने भन्दै उनले घोषणा पत्र कार्यान्वयन गर्न आवश्यक स्रोत र उपायसमेत स्पष्ट रूपमा उल्लेख गरिने बताए।
घोषणापत्र निर्माण क्रममा कांग्रेसले जिल्ला–जिल्लाबाट सुझाव संकलन गरेको छ।
स्थानीय तह, क्षेत्र र जिल्लाबाट आएका सुझावलाई एकीकृत गरेर राष्ट्रिय आवश्यकतासँग जोडिने पनि कांग्रेसले जनाएको छ।
घोषणा पत्रले वर्तमान चुनौती र भविष्यको दिशालाई एकैसाथ सम्बोधन गर्नेसमेत प्रवक्ता चालिसेले बताए।
‘पार्टीले घोषणा पत्रमार्फत् स्थिरता, उत्तरदायित्व र समावेशी विकासको स्पष्ट खाका जनतासामु राख्ने तयारी गरेको छ,’ उनले भने, ‘यसपालि घोषणा पत्र छोटो हुनेछ।’
पार्टीको घोषणा पत्रमा ‘भिजन–१०’ समेटिने भएको छ।
'कांग्रेसले गर्न सक्ने क्षमता, व्यवहारिकता र कार्यान्वयन योग्य कार्यक्रम समेटिएको घोषणापत्र ल्याउँछ,' उनले भने, 'यसले सबै वर्ग, क्षेत्र र समुदायको भावना समेट्ने प्रयास गर्नेछ।'
-ink-1769159115.jpeg)
-1746009348.jpg)
