'मसँग रूप, रंग, जवानी सबै थियो, केही कुराको कमी थिएन। तर कसैको धोकाले मलाई सडकमा ल्याइपुर्यायो।'
यति भनिरहँदा जमुना खत्रीका आँखा आँसुले भरिए।
आफूमाथि बलात्कार र मानसिक यातना भएको दाबी गर्दै उनी न्यायको मागसहित करिब एक महिनादेखि काठमाडौंको माइतीघर मण्डलमा असन र धर्ना बसिरहेकी छन्।
कर्णालीका एमाले नेता कर्णबहादुर मल्लले आफूमाथि बलात्कार गरेको उनको आरोप छ।
जमुनाले चैत ८ गते यही माग राखेर माइतीघर मण्डलमा आमरण अनसन सुरू गरेकी थिइन्। अनसनको छैटौं दिन चैत १४ गते प्रहरीले मुगुको सोरू गाउँपालिका–१० घर भई हाल काठमाडौंको चन्द्रागिरि नगरपालिका–७ बस्ने ५२ वर्षीय मल्ललाई पक्राउ गरेको थियो।
मल्ल पक्राउ परेपछि ललितपुर प्रहरी र प्रमुख जिल्ला अधिकारीको उपस्थितिमा जमुनाले अनसन तोडिन्।
अनसन तोडे पनि सडक भने छाडेकी छैनन्।
आफूले न्याय नपाएसम्म आन्दोलन जारी राख्ने उनको अडान छ। आरोपीलाई आजीवन कारावास र आफूलाई क्षतिपूर्तिको उनले माग गरेकी छन्।
कालीकोटको शुभकालिका गाउँपालिका–६ घर भएकी २९ वर्षीया जमुना करिब एक दशकदेखि ललितपुरमा भाइबहिनीसँग बस्दै आएकी थिइन्। सानै उमेरमा आमाबुबा गुमाएकी उनले नै भाइबहिनीको हेरचाह गर्दै आएकी छन्।
पारिवारिक जिम्मेवारीका कारण कक्षा १० पछि पढाइ अघि बढाउन नसके पनि गायन क्षेत्रमा उनको रूचि थियो।
सानैदेखि सुदूरपश्चिमको देउडा गीत गाउँदै आएकी उनी विद्यालय र गाउँका सांस्कृतिक कार्यक्रममा सक्रिय रहन्थिन्। गायिका बन्ने सपना बोकेकी उनी अवसर खोज्दै दोहोरी गीत गाएर सामाजिक सञ्जालमा लाइभसमेत बस्ने गर्थिन्।
'आफ्नो कला देखाउने ठाउँ पाइरहेकी थिइनँ। त्यसैले दोहोरी गीत गाएर फेसबुक लाइभमा गाउने गर्थें,' उनले भनिन्, 'अलिअलि अवसर पनि पाइरहेकी थिएँ। तर गलत नियत भएको व्यक्तिसँगको सम्बन्धले जीवन नै बिग्रियो।'
उनका अनुसार २०८० सालमा गाउँकै साथीमार्फत घुम्न जाने क्रममा कर्णबहादुर मल्लसँग चिनजान भएको थियो।
'गाउँकै साथीले भनेपछि घुम्न गएँ। साथीले कर्ण मल्ललाई लिएर आएको थियो, त्यहीँ चिनजान भयो,' उनले भनिन्, 'पछि नम्बर साटासाट भयो।'
त्यसपछि सामाजिक सञ्जाल र फोनमार्फत कुराकानी बढ्दै गयो। मल्लले आफू श्रीमतीले छाडेर एक्लै बसिरहेको बताउने गरेको उनले सुनाइन्।
'आफूभन्दा दुई दशक जेठो मान्छेले दुःखका कुरा गर्दा सुरूमा खासै चासो लागेन,' उनले भनिन्, 'तर दिनहुँ फोन गरेर दुःखी भएको भन्दै रून थालेपछि माया लाग्दै गयो।'
बिस्तारै सम्बन्ध नजिकिँदै गएको उनले बताइन्।
'म गायन क्षेत्रमा अघि बढ्दै थिएँ। आफ्नै खर्च त्यहीँबाट चल्थ्यो,' उनले भनिन्, 'तर बिस्तारै कार्यक्रमहरूमा जान नदिने र खर्च आफै बेहोर्ने भन्दै प्रलोभन दिन थाल्यो। म त्यसमा पर्दै गएँ।'
यसबीच झन्डै दुई वर्षसम्म आफूमाथि यौन शोषण भएको र गर्भवती भएपछि जबरजस्ती गर्भपतन गराइएको जमुनाको दाबी छ।
उनका अनुसार सम्बन्धमा बेला–बेला विवाद भए पनि विवाह गर्ने प्रलोभन देखाएर शारीरिक सम्बन्ध कायम राख्ने गरिएको थियो। पछि गर्भ नबसोस् भनेर मल्लले गर्भनिरोधक औषधि खुवाउने गरेको उनले बताइन्।
'शारीरिक सम्बन्धपछि दिनहुँ पिल्स खुवाउने गर्थे। पछि मात्र थाहा भयो, त्यसरी दैनिक खान हुँदैन रहेछ,' उनले भनिन्, 'माया गर्ने मान्छेले राम्रै औषधि दिएको होला भन्ने लाग्थ्यो।'
एकपटक भने छ साताको गर्भ बसेपछि त्यसलाई जबरजस्ती हटाइएको उनले दाबी गरिन्।
'बच्चा जन्माउने सोच थियो। तर जबरजस्ती सातदोबाटोको किष्ट अस्पताल लगेर गर्भपतन गराइयो,' उनले भनिन्, 'त्यसपछि छाडेर हिँडे।'
त्यसपछि आफू ठगी र बलात्कारको सिकार भएको महसुस गर्दै फागुन ५ गते जिल्ला प्रहरी परिसर ललितपुरमा उजुरी दिएको उनले जानकारी दिइन्।
'बलात्कार, जबरजस्ती गर्भपतन र झन्डै दुई वर्ष यौन शोषण गरेको भन्दै उजुरी दिएको छु,' उनले भनिन्, 'एक महिनासम्म पनि पक्राउ नभएपछि आमरण अनसन बसेकी हुँ।'
उनी अनसन बसेको छैटौं दिन पक्राउ परेका मल्ललाई सातदोबाटो प्रहरी कार्यालयमा राखिएको जिल्ला प्रहरी परिसर ललितपुरका एसपी गौतम मिश्रले जानकारी दिए।
'यो घटनामा हामीले अनुसन्धान गरिरहेका छौं,' उनले भने।
यसबीच चैत ८ देखि निरन्तर माइतीघरमा बसिरहेकी जमुनालाई गृहमन्त्री सुधन गुरूङले भेटेर न्याय दिलाउन पहल गर्ने आश्वासन दिएका छन्।
'गृहमन्त्रीले न्यायका लागि सक्दो पहल गर्ने बताउनुभएको छ,' उनले भनिन्, 'यो सरकारले न्याय दिन्छ भन्ने आशा छ।'
माइतीघरमा धर्ना बसिरहँदा रातभर प्रहरीसमेत त्यहीँ रहने भएकाले आफूलाई सुरक्षित महसुस हुने उनले बताइन्।
***
-1776591960.jpeg)
-1746009348.jpg)
