विपक्षी दलहरूले प्रधानमन्त्रीसँगको प्रश्नोत्तर कार्यक्रम सञ्चालनको माग गर्दै प्रतिनिधिसभा बैठकमा विरोध जारी राख्ने भएका छन्।
प्रमुख प्रतिपक्षी दल नेपाली कांग्रेस, नेकपा एमाले, नेकपा र राप्रपाका प्रमुख सचेतकको बैठकले विरोध जारी राख्ने निर्णय गरेको हो।
'हामी बैठकमा उठेर विरोध गर्छौं, सभामुखले जबरजस्ती गर्नुभयो भने हामी सशक्त विरोध गर्छौं,' नेकपा एमालेका प्रमुख सचेतक ऐन महरले भने, 'संसदमा प्रधानमन्त्रीले आएर सांसदका प्रश्नको जबाफ दिनुपर्छ।'
विपक्षी दलहरूले लोकतन्त्र र नियमावलीको पालनाका लागि एक भएर अघि बढ्ने निर्णय गरेका छन्।
'कार्यपालिकालाई संसदप्रति जबाफदेही बनाउनेमा हामी दृढतापूर्वक लाग्छौं। विपक्षीहरू एकजुट भएर अघि बढ्ने समझदारी भएको छ,' उनले भने।
विपक्षमा रहेका चारवटा दलका प्रमुख सचेतक र सचेतकहरूको बैठक सिंहदरबारस्थित एमाले दल कार्यालयमा भएको थियो।
प्रतिनिधिसभा नियमावलीको नियम ५६ मा महिनाको पहिलो साता कुनै दिन प्रधानमन्त्रीसँग एक घन्टा प्रश्नोत्तर कार्यक्रम सञ्चालन गर्ने व्यवस्था गरेको छ। नियमावलीले यस्तो प्रश्नोत्तरका लागि समय निर्धारण गर्ने जिम्मा सभामुखलाई दिएको छ।
प्रतिनिधिसभा नियमावली अनुसार जेठ पहिलो साता यस्तो प्रश्नोत्तर कार्यक्रम सञ्चालन हुनुपर्ने थियो। अन्यथा सभामुखले अर्को कुनै मिति तोक्नुपर्ने थियो।
तर सभामुख डोलप्रसाद अर्यालले प्रधानमन्त्री कार्यालय पुगेर आग्रह गर्दा समेत प्रधानमन्त्री बालेन शाह प्रश्नोत्तरका लागि आउन मानेका थिएनन्।
प्रधानमन्त्री शाहले सभामुख अर्याललाई प्रतिनिधिसभामा आफूले उपयुक्त समयमा जबाफ दिने बताएका थिए। प्रतिनिधिसभा बैठक जेठ १२ गते बस्दैछ।
