सुदूरपश्चिम प्रदेशका मुख्यमन्त्री कमलबहादुर शाहले बाजुरा-हुम्लाको सीमा विवादको क्रममा घाइते भएकाको प्रदेश सरकारले उपचार गरिदिने बताएका छन्।
बाजुराको हिमाली गाउँपालिका–३ च्याचौर क्षेत्रमा निर्माणाधीन अस्थायी प्रहरी चौकीको विषयमा भएको झडपमा घाइते भएकाहरूको उपचार खर्च सुदूरपश्चिम प्रदेश सरकारले बेहोर्ने उनले बताएका हुन्।
नेपाली कांग्रेसको बृहत्तर एकता र पुनर्जांगरणका लागि आयोजित सुदूरपश्चिम प्रदेशस्तरीय भेलालाई सम्बोधन गर्दै उनले बाजुराका स्थानीय घाइतेहरूको उपचारको सम्पूर्ण जिम्मा प्रदेश सरकारले लिने र क्षतिपूर्तिको यकिन विवरण आएपछि त्यसको व्यवस्थापनमा समेत सरकार गम्भीर रहने बताएका हुन्।
उनले घटनामा संलग्न दोषीमाथि कानुनी कारबाहीका लागि प्रहरी प्रशासनले सक्रियता बढाएको जानकारी दिँदै अवरूद्ध कर्णाली कोरिडोर तत्काल सुरु गर्न स्थानीयवासीलाई आग्रह गरे।
जेठ २ गते च्याचौर अस्थायी प्रहरी चौकी निर्माण गर्ने क्रममा हुम्लाका स्थानीयले अवरोध गर्दा झडप भएको थियो। हुम्लाका स्थानीयको कुटपिटबाट बाजुराका ६ जना घाइते भएका थिए।
