नेपाल–भारत सम्बन्धमा देखिएको अनिश्चितताबीच राष्ट्रिय स्वतन्त्र पार्टी (रास्वपा) का सभापति रवि लामिछाने जेठ तेस्रो साता भारत भ्रमणमा जाने भएका छन्।
तीन सदस्यीय भ्रमण टोली भारत भ्रमणमा जाने निश्चित भएको रास्वपाका एक पदाधिकारीले सेतोपाटीलाई जानकारी दिए।
'सभापति, सहमहामन्त्री विपिन आचार्य र सचिवालय सदस्य दीपक बोहरा भारत जाने कार्यक्रम तय भएको छ,' ती नेताले भने।
भारतीय विदेश सचिव विक्रम मिश्रीको नेपाल भ्रमण रद्द हुनु र नेपालका नवनिर्वाचित प्रधानमन्त्रीको परम्परागत भारत भ्रमण पनि टुंगो नलाग्नुले दक्षिणी छिमेकीसँगको सम्बन्धलाई लिएर प्रश्न उठ्न थालेका बेला सत्तारूढ दलका सभापतिसहित प्रतिनिधि मण्डलको भारत भ्रमण हुन लागेको हो।
उनीहरू जेठ १८ गते भारत भ्रमणमा जानेछन् भने २० गते फर्कने कार्यक्रम तय छ।
उनीहरू भारतको राजधानी नयाँदिल्ली जान लागेको रास्वपाका अर्का एक नेताले पनि पुष्टि गरे। 'भ्रमणमा जाने मिति तय भएको छ। भेटवार्ता र अन्य कार्यक्रम तय भएको छैन,' उनले भने।
सभापति लामिछानेले भारत भ्रमण क्रममा प्रधानमन्त्री नरेन्द्र मोदी, विदेशमन्त्री एस जयशंकर लगायतसँग भेट गर्ने तयारी भइरहेको स्रोतहरू बताउँछन्।
यसअघि फागुन २१ को निर्वाचनमा रास्वपाले झन्डै दुई–तिहाइ बहुमत प्राप्त गरेपछि भारतीय प्रधानमन्त्री मोदीले फोन गरेर सभापति लामिछानेलाई बधाई दिएका थिए। नयाँ सरकार गठनपछि पहिलो पटक सभापति लामिछानेको नेतृत्वमा रास्वपाको प्रतिनिधिमण्डल भारत भ्रमणमा जान लागेको हो।
यसबीच भारतको राजधानी नयाँदिल्लीमा बाघ, चितुवा लगायतका वन्यजन्तु संरक्षणसम्बन्धी अन्तर्राष्ट्रिय अन्तरसरकारी समूह 'बिग क्याट अलायन्स' को पहिलो सम्मेलनमा भाग लिन परराष्ट्रमन्त्री शिशिर खनाल जाने तय भएको थियो। भारतीय प्रधानमन्त्री मोदीले उद्घाटन गर्ने यो सम्मेलन जेठ १९ र २० गते चल्ने भनिएको थियो।
तर विश्वव्यापी इबोला संक्रमणको चिन्ताबीच भारतले अहिलेलाई सम्मेलन स्थगित गरेको छ।
त्यही सम्मेलन क्रममा परराष्ट्रमन्त्री खनालले भारतीय विदेशमन्त्री एस जयशंकर र वाणिज्यमन्त्री पियूष गोयलसँग 'साइडलाइन' वार्ता गर्ने तयारी भइरहेको थियो।
भारतीय विदेशमन्त्री जयशंकरलाई नेपाल भ्रमणको औपचारिक निम्तो दिने तयारी पनि थियो।
भारतीय विदेशमन्त्रीको नेपाल भ्रमण तय भएको अवस्थामा फागुन २१ को निर्वाचनपछि झन्डै दुई–तिहाइ बहुमतसहित आएको नयाँ दलको नयाँ सरकारसँग भारतीय संस्थापनको सम्बन्ध विस्तारमा महत्त्वपूर्ण कूटनीतिक खुड्किलो बन्न सक्थ्यो।
यसले विदेश सचिव मिश्रीको रद्द नेपाल भ्रमणले उत्पन्न गराएको अनिश्चितता मेटिने परराष्ट्र अधिकारीहरूको आशा थियो। प्रधानमन्त्री बालेन शाहको भारत भ्रमणको तिथि तय गराउने वातावरण निर्माण हुनेमा पनि उनीहरू आशावादी थिए।
सम्मेलन स्थगनसँगै नेपाल–भारत सम्बन्धमा देखिएको अनिश्चितता हटाउने कूटनीतिक पहल लिन नयाँ बाटो खोज्नुपर्ने भएको थियो। यस्तो बेला सत्तारूढ दलका सभापतिको भारत भ्रमण तय हुनुले यसलाई महत्त्वका साथ हेरिएको छ।
विदेश सचिव मिश्री गत वैशाख २८ गते नेपाल आउने भनिएको थियो। परराष्ट्र मन्त्रालयले औपचारिक रूपमा मिति टुंगो नलागेको भन्दै आए पनि प्रधानमन्त्री बालेन शाहले द्विपक्षीय भेटवार्ता गर्न नमानेकाले मिश्रीको भ्रमण रद्द भएको स्रोतहरू बताउँछन्।
यसअघि अमेरिकी राष्ट्रपति डोनाल्ड ट्रम्पका विशेष दूत सर्जिओ गोरलाई पनि प्रधानमन्त्री बालेनले भेट्न मानेका थिएनन्।
-1778415511.jpeg)
