राष्ट्रिय स्वतन्त्र पार्टी (रास्वपा)ले संघीय सांसदहरूलाई संसदीय फाँटमा मात्रै सक्रिय रहन प्रेरित गर्ने भएको छ। रास्वपाले अहिले महाधिवेशनकेन्द्रित कार्ययोजना बनाइरहेको छ। तहगत समितिहरूको अधिवेशन पनि भइरहेको छ।
यही सन्दर्भमा सांसदहरूले पार्टी भूगोलमा पनि काम गर्न इच्छा राखेको भन्दै त्यसमा प्रेरित नगर्ने नीति रहेको महामन्त्री कविन्द्र बुर्लाकोटीले जानकारी दिएका छन्।
यसबारे सचिवालय बैठकमासमेत छलफल भएको थियो। सचिवालय बैठकले त्यही सैद्धान्तिक निर्णय गरेको हो।
‘यहाँहरूको अमूल्य समय, विज्ञता र सामथ्र्यको अधिकतम सदुपयोग देशको नीति–निर्माण र नागरिकका समस्या समाधानको सन्दर्भमा नै बढीहोस् भन्ने हेतुले, संघीय संसदका सदस्यहरूलाई संसदीय भूमिका र पार्टीको केन्द्रीय संरचनामा रही नीति निर्माण तहमा रणनीतिक भूमिकामा केन्द्रित रहन प्रेरित गर्ने पार्टीको नीति रहेको व्यहोरा अनुरोध गरिन्छ,’ महामन्त्री बुर्लाकोटीले सांसदहरूलाई सम्बोधन गर्दै विज्ञप्तिमार्फत जानकारी गराएका छन्।
मुलुकको सार्वभौम संसद, संसदीय समितिहरू र विभिन्न विधायकी फाँटहरूमा यहाँहरूले निर्वाह गरिरहनु भएको भूमिका उदाहरणीय रहेको पनि उनले बताएका छन्। आगामी दिनहरूमा पार्टीका संसदीय गतिविधिहरूलाई अझ बढी तार्किक, नीतिगत रूपमा प्रभावकारी र जनमुखी बनाउनुपर्ने गहन जिम्मेवारी रहेको पनि उनले स्मरण गराएका छन्।
‘यसका साथै आ– आफ्नो निर्वाचन क्षेत्रका नागरिकका नियमित गुनासोहरू सुन्ने, जनअपेक्षा पूरा गर्ने यहाँहरूको दायित्व पनि रहेको छ। हामी सबैलाई विदितै छ, पार्टी संगठन दैनिक रूपमा तीव्र गतिमा विस्तार भइरहेको छ। यस्तो अवस्थामा सङ्गठनभित्र सबै गतिविधि नियमित राख्न र आन्तरिक चुनौती एवं विवादहरूको समयमै निरूपण गर्न, र दैनिक सङ्गठनात्मक कार्यहरूलाई गतिशील बनाइ राख्न उत्तिकै आवश्यक छ। उल्लिखित गहन संसदीय जिम्मेवारी र निर्वाचन क्षेत्रको अत्याधिक व्यस्तताकाबीच यहाँहरूको लागि आफ्नो निर्वाचन क्षेत्रबाहेक अन्यत्र भूगोलको सङ्गठनात्मक जिम्मेवारी सम्हाल्नु व्यावहारिक रूपमा चुनौतीपूर्ण र कार्य बोझका दृष्टिले समेत बोझिलो हुन सक्ने देखिन्छ,’ उनले भनेका छन्।
