नेकपा एमाले पार्टी सदस्यता विस्तारको नयाँ कार्ययोजनअन्तर्गत पार्टी सदस्यका छोराछोरीको सम्मेलन गर्ने योजना अघि सारेको छ।
जेठ २० र २१ गते संगठन विभागले आयोजना गरेको राष्ट्रिय कार्यशालाबाट छोराछोरीलाई पार्टीमा जोड्ने संकल्प गरेको हो।
एमालेले नयाँ पुस्तासँग अन्तरसंवाद कार्यक्रम आयोजना गर्ने लक्ष्य पनि लिएको छ।
‘नयाँ पुस्तासँग अन्तरसंवाद कार्यक्रमको आयोजना गरी पार्टी आबद्ध परिवारका छोराछोरीहरूको सम्मेलन सबै कमिटीले आयोजना गर्ने घोषणा गर्दछ,’ एमालेको संकल्पमा भनिएको छ।
छोराछोरी जोड्ने अभियान नयाँ भने होइन।
२०८० वैशाखमा बसेको केन्द्रीय कमिटीको पाचौं बैठकले छोराछोरी अभियान चलाउने निर्णय गरेको थियो।
त्यस केन्द्रीय कमिटी बैठकमा धारणा राख्ने अधिकांश सदस्यले पार्टीमा युवाको आकर्षण कमजोर बनेको निष्कर्ष सुनाएका थिए।
कतिपय केन्द्रीय सदस्यले छोराछोरीलाई समेत सम्झाउन नसक्दा राष्ट्रिय स्वतन्त्र पार्टी जस्ता नवोदित पार्टीमा मत गएको बताएका थिए।
त्यसैलाई लक्षित गरेर एमालेले छोराछोरी अभियान सुरू गर्ने निर्णय गरेको थियो। यद्यपि त्यो प्रभावकारी बनेन।
‘पार्टीमा युवा पुस्ताको आकर्षण बढाउन, बाबुआमा एमालेमा प्रतिबद्ध हुने, छोराछोरीले कम्युनिष्ट पार्टी के हो नबुझ्ने अवस्था नहोस् भनेर छोराछोरी अभियान चलाउन लागिएको हो,’ त्यतिबेला एमालेले भनेको थियो।
त्यस अभियानअन्तर्गत पार्टीका नेता, कार्यकर्ता र सदस्यका छोराछोरीलाई पार्टीमा जोड्ने, त्यसका लागि राजनीतिक, वैचारिक प्रशिक्षण चलाउने एमालेको योजना थियो। एकाध स्थानमा लागू पनि भयो।
सबैतिर लागू हुन नसक्दा यसपटक उल्लेख्य मत घटेको बुझाइसहित छोराछोरीहरूको सम्मेलन नै गर्ने गरी नयाँ खाका अघि सारेको हो।
