नेकपा एमालेका महासचिव शंकर पोखरेलले खुला आत्मसमीक्षा, कमजोरीको स्विकारोक्ति, एकता र अनुशासनबाट नै पार्टीसामू देखिएका चुनौतीको सामना गर्न सकिने बताएका छन्।
सामाजिक सञ्जाल फेसबुकमार्फत शुक्रबार बिहान स्ट्याटस लेख्दै महासचिव पोखरेलले यी सबै काम संस्थागत र विधिसम्मत प्रक्रियाबाट मात्र सफल हुन सक्ने धारणा राखेका हुन्।
‘पार्टीका सामु चुनौती छन्, तर तिनको सामना गर्न सकिन्छ। समस्या छन्, समाधान गर्न सकिन्छ। निर्वाचन परिणामले जनतासँगको सम्बन्ध कमजोर भएको देखाएको गरेको छ, त्यसलाई पुनः मजबुत बनाउन पनि सकिन्छ,’ उनले भनेका छन्, ‘तर त्यसका लागि खुला आत्मसमीक्षा, कमजोरीको स्विकारोक्ति, एकता र अनुशासन अपरिहार्य छन्। यी सबै काम संस्थागत र विधिसम्मत प्रक्रियाबाट मात्र सफल हुन सक्छन्।’
निर्वाचन परिणामपछि एमालेभित्र पार्टी पुनर्गठनको बहस पेचिलो बनिरहेको छ। सचिवालय बैठकले यससम्बन्धी कार्ययोजनाको सुझाव तयार पार्ने गरी कार्यदलसमेत बनाएको छ। महासचिव पोखरेल पछिल्लो समय पार्टी पुनर्गठनकै कित्तामा उभिएका छन्।
