नेपाली कांग्रेसका सहमहामन्त्री तथा सदस्यता व्यवस्थापन समितिका सदस्य प्रकाश रसाइली 'स्नेही' ले पार्टीले कसैलाई पनि स्वत: क्रियाशील सदस्यता अद्यावधिक नगर्ने बताएका छन्।
केही शीर्ष नेताहरूको क्रियाशील सदस्यता पार्टीले स्वत: अद्यावधिक गरिदिने भन्ने चर्चा चलेकोतर्फ लक्ष्य गर्दै उनले स्वत: कसैको पनि क्रियाशील सदस्यता अद्यावधिक नहुने प्रष्ट पारेका हुन्।
‘कांग्रेस पार्टीभित्र कुनै पन व्यक्तिलाई अद्यावधिकमा छुट हुने वा स्वत: अद्यावधिक गरिदिने भन्ने हुँदैन, पार्टीले गरेको निर्णय सबैले मान्नुपर्छ, पार्टीका सबैलाई एकै नियम हो, कसैलाई क्रिकेटको, कसैलाई फुटबलको नियम भन्ने हुँदैन,’ सेतोपाटीसँग कुराकानी गर्दै उनले भने, ‘पार्टीमा कोही ठूलो, कोही सानो भन्ने हुँदैन, समान हो। अधिवेशन प्रक्रियामा सबै सामेल हुनुपर्छ।’
कुनै नेता विशेष वा उमेर समूह भनेर स्वत: अद्यावधिक नहुने पनि उनले बताएका छन्।
गत पुससम्म क्रियाशील सदस्यता नवीकरण गरेकाहरूलाई थप विवरण माग गर्दै वैशाख १ देखि कांग्रेसले क्रियाशील सदस्यता अद्यावधिक गरिरहेको छ। अद्यावधिक कार्य जेठ २८ गते मध्यरात १२ बजेसम्म गर्न मिल्नेछ।
उनकाअनुसार अहिलेसम्म अद्यावधिक गर्नेको संख्या करिब ५ लाख पुग्न लागेको छ। ‘भरैभोलिसम्म ५ लाख पुग्छ, बिहानसम्म ४ लाख ६० हजार कटिसकेको थियो,’ उनले भने।
कांग्रेसले वैशाख १ देखि जरा अभियानसँगै क्रियाशील अद्यावधिक अभियान पनि सुरू गरेको थियो तर सुरूका दिनमा अद्यावधिक गर्ने कम थिए।
पछिल्लो समय पदाधिकारीहरूलाई प्रदेशगत रूपमा अनुगमन गर्ने गरी खटाइएपछि र क्रियाशील अद्यावधिक गर्न अटेरी गर्ने वडा सभापतिलगायत केहीको जिम्मेवारी अर्को व्यक्तिलाई दिन थालेपछि अद्यावधिक गर्नेहरू बढेका छन्।
साथै कांग्रेसले अनलाइनबाटै नयाँ क्रियाशील सदस्यता आवेदन पनि खुला गरेको छ।
कांग्रेसले असोजमा १५ औं महाधिवेशन गर्दैछ। त्यसका लागि क्रियाशील अद्यावधिक गर्न लागेको हो। क्रियाशील अद्यावधिक कार्य पूरा भएपछि मात्रै महाधिवेशनका अरू प्रक्रियाहरू सुरू हुने कांग्रेसले जनाएको छ।
२०७८ मा १४ औं महाधिवेशन गर्दा कांग्रेसमा ८ लाख ८२ हजार ८ सय १६ जना क्रियाशील सदस्य कायम थिए। तीमध्ये गत पुसमा करिब ६ लाखले मात्रै नवीकरण गरेका थिए।
