निवर्तमान गृहमन्त्री तथा राष्ट्रिय स्वतन्त्र पार्टी गोरखा १ का सांसद सुधन गुरूङले अधिवेशनहरूमा हानाहान नगर्न आग्रह गरेका छन्।
आफूले दुई-तीन ठाउँका अधिवेशनमा हानाहान भएको देखिरहेको उनको भनाइ छ।
‘दुई-तीन वटा ठाउँमा मैले देखिरहेको छु कि हानाहान परिरहेको छ, त्यो भनेको पुरानो राजनीतिक संस्कार हो, यो कुरालाई हामी तोड्नुपर्नेछ,’ आज गृहजिल्ला गोरखामा रास्वपा जिल्ला अधिवेशन उद्घाटन समारोहमा बोल्दै उनले भने, ‘रास्वपा के हो भन्ने उदाहरण पेस गर्नुपर्नेछ।’
अधिवेशनमा प्रतिस्पर्धा गर्न लागेकाहरूलाई शुभकामना दिँदै उनले सबै मिलेर संगठित हिसाबले अघि बढ्नुपर्ने बताए।
‘विवाद नहोस्, झगडा नहोस्, दुई-तीन ठाउँमा विवाद र झगडा भएको देखिएको छ,’ उनले भने, ‘संघीय सरकार त बनिसकेको छ, प्रदेश र स्थानीय सरकार पनि मिलेर देश बनाऔं,’ उनले भने।
