नेपाली कांग्रेसका सचेतक निश्कल राईले प्रधानमन्त्री बालेन शाह र उनका शुभचिन्तकहरू नेपालले भारतको जग्गा अतिक्रमण गरेको प्रमाणित गर्न लागिपर्दै 'नेपाललाई सीमा अतिक्रमणकारी देश' का रूपमा उभ्याउन खोजेको आरोप लगाएका छन्।
मंगलबार प्रतिनिधिसभा बैठकमा उनले प्रधानमन्त्री शाहले भनेजस्तो नेपालले छिमेकी देश भारतको कुनै पनि भूभाग नमिचेको उल्लेख गर्दै इलामको मेची किनारस्थित २६ नम्बर पिलरमुनिको नाखापानी र सानो श्रीबुङ गाउँको भौगोलिक वस्तुस्थिति स्मरण गराए।
'म त्यो गाउँमा जन्मे-हुर्केको मान्छे हुँ। मेरो क्षेत्रमा सीमासम्बन्धी केही समस्या छन्। तर म आज सदनमा उभिएर भन्छु— नेपालले छिमेकी देश भारतको कुनै पनि जमिन वा भूभाग मिचेको छैन,' सांसद राईले भने, 'तर सम्माननीय प्रधानमन्त्रीज्यू नेपालले भारतको जग्गा अतिक्रमण गरेको छ भनेर प्रमाणित गर्न लाग्नुभएको छ। सामाजिक सञ्जालमा उहाँका शुभचिन्तकहरूले समेत नभएका प्रमाण सिर्जना गरेर नेपाललाई सीमा अतिक्रमणकारी देश देखाउन खोज्नुभएको छ।'
उनले देशको बेइज्जत गर्दा आनन्द मान्ने प्रधानमन्त्री र उनका समर्थकहरूको मानसिकतामाथि प्रश्न उठाउँदै यसलाई 'राष्ट्रिय अस्मितामाथिको धावा' को संज्ञा दिए।
नेपाली कांग्रेस लगायत प्रतिपक्षी दलहरूले विगत केही बैठकदेखि नै सीमासम्बन्धी प्रधानमन्त्रीको अभिव्यक्तिलाई लिएर सदनमा आवाज उठाइरहेका छन्। प्रधानमन्त्री स्वयं सदनमा उपस्थित भएर आफ्नो अभिव्यक्ति सच्याउँदै माफी माग्नुपर्ने माग सांसद राईले मंगलबारको बैठकमा पनि दोहोर्याए।
'प्रधानमन्त्रीज्यूले सम्मानित सदनमा स्वयं आफै उपस्थित भएर आफ्नो अभिव्यक्तिको आलोचना गर्दै माफी माग्नुपर्छ भनेर हामीले माग गरिरहेका छौं,' उनले भने, 'हामीलाई लागेको थियो, राष्ट्रको अस्मितामाथि धावा बोल्दै गर्दा सदनको अभिभावकको हैसियतमा सभामुख महोदयले त्यो अभिव्यक्ति हटाउन निर्देशन दिनु हुनेछ। तर त्यसो हुन सकेन।'
सभामुख डिपी अर्यालले उक्त अभिव्यक्ति संसदको रेकर्डबाट हटाउन निर्देशन नदिएकोमा असन्तुष्टि जनाउँदै उनले अगाडि भने, 'आज पनि हामी सभामुख महोदयको साथ चाहन्छौं। अभिभावकत्व चाहन्छौं। तपाईंको शालिनताको उच्च कदर पनि गर्छौं। रोस्ट्रममा प्रधानमन्त्रीज्यूलाई बोलाएर यस विषयमा जबाफ दिने र उहाँले राष्ट्रिय हित विपरीत बोलेका कुरामा उहाँबाट आत्मालोचना होस् भन्ने चाहन्छु। सभामुख महोदय खुट्टा नकमाइकन हजुरले रूलिङ गर्नुहोस् भन्ने हामी चाहन्छौं।'
यो देशलाई एकीकरण गर्न विश्वभर उपनिवेश प्रथा हाबी हुँदा समेत नेपाललाई सार्वभौम र अखण्ड एकबद्धता राख्न पृथ्वीनारायण शाहदेखि बलभद्र कुँवर, अमरसिंह थापा, भक्ति थापा, भीमसेन थापा लगायत योद्धाहरूको योगदान उनले स्मरण गरेका थिए।
यति मात्र होइन, प्रधानमन्त्री बालेन शाहले काठमाडौं महानगरपालिकाको मेयरका रूपमा आफ्नो कार्यकक्षमा 'ग्रेटर नेपाल' को नक्सा राखेको घटना स्मरण गर्दै सांसद राईले अगाडि भने, 'प्रधानमन्त्रीजूले त्यो इतिहास पढ्नुभएकै होला। आज किन र कसको स्वार्थमा उहाँ हाम्रो स्वाभिमानमाथि धावा बोल्दै हुनुहुन्छ। प्रधानमन्त्रीजूको अभिव्यक्तिले आफ्नो ज्यान आहुती दिएर नेपालको सीमा पूर्वमा चिवा भञ्ज्याङदेखि पश्चिममा लिम्पियाधुरासम्म कायम गराउने ती अमर सहिदहरूको आत्मसम्मान कति गिरेको होला?'
'त्यसैले आज ती अमर सहिदहरू, प्रजातन्त्र तथा नागरिक सर्वोच्चताका लागि भएका विभिन्न क्रान्ति, विभिन्न आन्दोलनका सहिदहरू तथा सुशासन र जबाफदेहिताका लागि भएको जेनजी विद्रोहका सहिदहरूलाई हामी सम्झन चाहन्छौं,' यति भनेर उनले सहिदहरूको सम्झनामा सदनमा पाँच मिनेट उभिएर सम्मान प्रकट गर्न आह्वान गरेका थिए।
