नेपाली कांग्रेसका नेता शशांक कोइरालाले असोज १५ गते वडा अधिवेशन गरिने बताएका छन्।
उनले विभिन्न अधिवेशन सकेर केन्द्रीय महाधिवेशन मंसिर २१ देखि २३ गतेसम्म गरिने बताएका हुन्। यसअघि जारी गरेको कार्यतालिका अनुसार नै १५ औं महाधिवेशन हुने उनले बताए।
आज चुनदेवी सम्पर्क कार्यालयमा आयोजित पत्रकार सम्मेलनमा बोल्दै उनले असोज ३ गतेको वडा अधिवेशनमा सहभागी नहुन पनि आग्रह गरे। नेपाली कांग्रेसले असोज ३ र ४ गते वडा अधिवेशन गरी विभिन्न तह अधिवेशन गरेर असोज १६ देखि १९ गतेसम्म १५ औं महाधिवेशन गर्दैछ।
निवर्तमान सभापति शेरबहादुर देउवा पक्ष भने यो महाधिवेशनमा सहभागी नभई बेग्लै महाधिवेशन गर्दैछन्। कोइराला १५ औं महाधिवेशन तयारी समिति संयोजक छन्।
कोइरालाले विशेष महाधिवेशन पक्षधरले महाधिवेशनको कार्यतालिका स्थगन गरेर वार्ता र संवादमार्फत सहमतिमा पुग्ने बाटो नरोजेको पनि बताए। अदालतको निर्णयको प्रतीक्षा नगरी महाधिवेशन एकलौटि रूपमा अगाडी बढाउन खोजेको देखिएको उनको भनाइ छ।
‘पार्टीको आधिकारिकतासम्बन्धी विषय सर्वोच्च अदालतमा विचाराधीन रहेको अवस्थामा पार्टीको अधिवेशन र महाधिवेशनको एकतर्फी रूपमा घोषणा गरिएको कार्यतालिका स्थगन गरेर वार्ता र संवादमार्फत् सहमतिमा पुग्ने वा सर्वोच्च अदालतको निर्णयको प्रतीक्षा नगरी एकलौटि रुपमा अगाडी बढ्नु कुनै पनि हालतमा उचित मान्न सकिन्न,’ संस्थापन पक्षतर्फ लक्ष्य गर्दै उनले भने।
पार्टीको मूल मर्म, लोकतान्त्रिक मूल्य–मान्यता र राष्ट्रिय दायित्वलाई केन्द्रमा राख्दै आफूहरूले सुरूदेखि नै सहमति, सहकार्य र एकताको आधारमा १५औं महाधिवेशन सम्पन्न गर्न निरन्तर प्रयास गरेको उनले दाबी गरेका थिए।
‘पार्टीलाई विभाजनको दिशातर्फ धकेल्ने कुनै पनि कदमबाट बच्न, संवाद र सहमतिमार्फत समाधान खोज्न तथा संगठनको आन्तरिक जीवनमा आँच नपुग्ने वातावरण निर्माण गर्न बारम्बार आग्रह गरियो तर दुर्भाग्यवश ती प्रयासहरूलाई सकारात्मक रूपमा ग्रहण गरिएन,’ उनले भने।
कोइरालालेआइतबारको केन्द्रीय कार्यसम्पादन समिति बैठकका निर्णयप्रति लक्ष्य गर्दै निश्चित सर्तहरू स्वीकार गरे मात्र पद व्यवस्थापन गरिने वा राजनीतिक सहमतिको सट्टा पद बाँडफाँडलाई समाधानको आधार बनाइने दृष्टिकोणले कांग्रेसको गौरवशाली इतिहास र लोकतान्त्रिक संस्कारलाई कमजोर बनाउने पनि बताए। नेपाली कांग्रेसका नेता–कार्यकर्ताहरूको आत्मसम्मान कुनै पदको सौदाबाजीको विषय हुन नसक्ने कोइरालाको भनाइ छ।
कांग्रेसले वडा अधिवेशनमा भाग लिन जाने १४ औं महाधिवेशनका केन्द्रीय सदस्यलाई विशेष महाधिवेशनबाट आएको केन्द्रीय सदस्य बराबर हैसियत दिने निर्णय गरेको थियो।
विशेष महाधिवेशनको नाममा पार्टीभित्र थप विवाद सिर्जना नगर्न, लोकतान्त्रिक प्रक्रियालाई कमजोर नबनाउन र संगठनात्मक एकतालाई क्षति नपुर्याउन आफूहरूले आग्रह गरेको कोइरालाले बताए।
विशेष महाधिवेशनबाट निर्मित नेतृत्वले गर्ने अधिवेशन र महाधिवेशनले पार्टीलाई एकताबद्ध बनाउनेभन्दा विभाजनलाई संस्थागत गर्न उद्दत भएको कोइरालाको भनाइ छ।
पार्टीको भविष्यलाई केन्द्रमा राखेर कानुनी र राजनीतिक दुवै पक्षको सम्मान हुने गरी समाधान खोज्नु आजको आवश्यकता भएको उनले बताए।
‘१४ औं महाधिवेशनबाट निर्वाचित वैधानिक नेतृत्वले सार्वजनिक गरेको कार्यतालिका अनुसार असोज १५ गतेदेखि सञ्चालन हुने वडा हुँदै विभिन्न तहको अधिवेशनमा सक्रिय सहभागिता जनाई मंसिर २१, २२ र २३ गते सम्पन्न हुने केन्द्रीय महाधिवेशनलाई सफल बनाउन सम्पूर्ण नेपाली कांग्रेसका साथीहरूमा हार्दिक अनुरोध गर्दछु,’ कोइरालाले भने।
यसअघि चुनदेवी र निवर्तमान सभापति शेरबहादुर देउवा निवासमा नेताहरूले छलफल पनि गरेका थिए। कांग्रेस केन्द्रीय कार्यसम्पादन समिति बैठकले गरेका निर्णय स्वीकार गर्न नसकिने भन्दै उनीहरूले बेग्लै महाधिवेशन गर्ने निष्कर्ष निकालेका थिए।
यस्तो छ कोइरालाले जारी गरेको विज्ञप्ति-
-1746009348.jpg)
