नेपाली कम्युनिस्ट पार्टी (नेकपा) संयोजक पुष्पकमल दाहाल ‘प्रचण्ड’ले धर्मनिरपेक्षता, संघीय लोकतान्त्रिक गणतन्त्र र जनताका मौलिक अधिकारमाथि प्रहार गर्ने कोसिस भइरहेको बताएका छन्।
संविधान दिवसका अवसरमा शुभकामना दिँदै प्रचण्डले नेपालको संविधान औपचारिक कानुनी दस्तावेज मात्रै नभई युगान्तकारी परिवर्तनलाई संस्थागत गर्ने ऐतिहासिक संकल्प र दस्तावेज भएको बताउँदै पछिल्लो समय यसमाथि प्रहारको कोसिस भइरहेको बताएका हुन्।
‘अहिले कहीँ न कहीँ, कतै न कतैबाट धर्मनिरपेक्ष, संघीय लोकतान्त्रिक गणतन्त्रमाथि र जनताका मौलिक अधिकारमाथि प्रहार गर्ने कोसिस भइरहेको देखिन्छ,’ उनले भने।
यस्तो अवस्थामा संविधान दिवस मनाउनुको अर्थ संविधानका मूलभूत सिद्धान्त र मूल्यमान्यताको रक्षा गर्दै जनतालाई अझ अधिकारसम्पन्न बनाउने संकल्प गर्नु भएको उनले बताए।
साथै राष्ट्रिय स्वाधीनतामाथि विभिन्न देशी–विदेशी प्रतिक्रियावादी तत्वबाट भइरहेका दबाब र हस्तक्षेपविरुद्ध देशभक्त तथा लोकतान्त्रिक शक्तिहरूलाई एकताबद्ध गर्ने संकल्प गर्नुपर्ने उनको भनाइ छ।
प्रचण्डले संविधान दिवसका अवसरमा देशभित्र र देशबाहिर रहेका नेपालीलाई उक्त संकल्पमा एकताबद्ध हुन अपिलसमेत गरेका छन्।
उनले संविधानले पहिलोपटक नेपाली जनतालाई सार्वभौमसत्तासम्पन्न बनाउँदै जनताका अधिकारलाई संस्थागत गरेको बताए।
खाद्य सम्प्रभुता, शिक्षा, स्वास्थ्य र रोजगारीलगायत मौलिक अधिकारलाई संस्थागत गर्ने ऐतिहासिक दस्तावेजका रूपमा पनि संविधान स्थापित भएको उनको भनाइ छ।
संविधानले उत्पीडित वर्ग, जाति, क्षेत्र, लिंग र समुदायलाई पहिचान र अधिकार दिलाएको प्रचण्डले बताए।
महिला, दलित, आदिवासी, मधेसी, मुस्लिम, थारूलगायत उत्पीडित समुदायलाई अधिकार र पहिचान दिलाउने काम संविधानले गरेको उनले उल्लेख गरे।
संविधानले सार्वजनिक, निजी र सहकारी क्षेत्रको समायोजनमार्फत आर्थिक विकासको नयाँ मार्गचित्र प्रस्तुत गरेको पनि प्रचण्डले बताए। समाजवादतर्फको यात्रालाई सुनिश्चित गर्ने व्यवस्था पनि संविधानमा रहेको उनको भनाइ छ।
-1746009348.jpg)
