सत्तारूढ राष्ट्रिय स्वतन्त्र पार्टी (रास्वपा) का सभापति रवि लामिछानेले संगठन बलियो बनाउन पार्टी, सरकार र संसदबीचको दूरी घटाउनुपर्ने विषय उठाएका छन्।
आइतबार सचिवालय बैठकमा बोल्दै उनले संगठन बलियो बनाउनतिर लाग्न सबैलाई निर्देशन दिएको रास्वपाका प्रवक्ता जगदीश खरेलले जानकारी दिए।
'आज सभापतिज्यूले पार्टी, संसद र सरकारबीच अन्योन्याश्रित सम्बन्ध हुनुपर्ने धारणा राख्नुभयो,' उनले सेतोपाटीसँग भने, 'यी तीन संस्थाबीचको सम्बन्ध बलियो बनाउन निर्देशन दिनुभयो।'
आजको सचिवालय बैठकमा रसुवा बाढीका पीडितहरूलाई राहत र पुनर्स्थापनाको विषय पनि उठेको थियो। राहत र पुनर्स्थापना एकैपटक गर्नुपर्ने अवस्था भएको र यसलाई सकेसम्म प्रभावकारी बनाउनुपर्ने सुझाव सरकारलाई बैठकले दिएको प्रवक्ता खरेलले बताए।
उनका अनुसार रसुवा बाढीमा परेर ज्यान गुमाएकाहरूको डिएनए संकलन, शव व्यवस्थापन र मृत्यु प्रमाणपत्र दिने विषयमा छलफल भएको थियो।
बाढीमा हजारौंको संख्यामा मानिसहरू परेर शव पहिचान नभए पनि परिवारले मृत्यु प्रमाणपत्र खोजेमा के गर्ने भन्ने छलफल चलेको थियो।
सचिवालय बैठकमा उपस्थित रास्वपाकी उपसभापति समेत रहेकी कानुनमन्त्री सोबिता गौतमले बाढीमा परेर बेपत्ता भएकाहरूको परिवारलाई तत्काल मृत्यु प्रमाणपत्र दिन कानुनी अड्चन रहेको बताएकी थिइन्।
सचिवालय बैठकले भने बाढीमा परेर बेपत्ता भएकाहरूको शव पहिचान नभए पनि परिवारले चाहे मृत्यु प्रमाणपत्र दिन मिल्ने गरी कानुनी अड्चन फुकाउन भनेको प्रवक्ता खरेलले जानकारी दिए।
त्यस्तै, आजको सचिवालय बैठकमा सेप्टेम्बर २२ देखि सुरू हुने संयुक्त राष्ट्रसंघको महासभामा भाग लिन प्रधानमन्त्री बालेन शाह अमेरिका जाने विषयबारे छलफल भएको छ। प्रधानमन्त्री शाह मंगलबार महासभामा भाग लिन अमेरिका जाँदैछन्।
'प्रधानमन्त्रीज्यूको भ्रमण सफल पार्नुपर्ने, पार्टीले पनि साथ दिने कुरा भयो। सचिवालयका सदस्यहरू तथा सरकारका मन्त्रीहरू बैठकमा आउनुभएको थियो। उहाँहरूमार्फत महासभामा उठाउनुपर्ने विषयबारे विभिन्न सुझावहरू पनि बैठकले दिएको छ,' उनले भने 'नेपालमा राजनीतिक परिवर्तन भएको र रास्वपाले नेतृत्व गरेको सरकारले आर्थिक तथा समृद्धिका लागि काम गरिरहेको भनेर अन्तर्राष्ट्रिय जगतलाई सन्देश दिनुपर्ने, क्लाइमेट जस्टिसको कुरा उठाउनुपर्ने र रसुवा बाढीपछि नेपाललाई अन्तर्राष्ट्रिय सहयोग चाहिएको लगायतका विषय उठाउनु पर्ने सचिवालयको सुझाव छन्।'
-1746009348.jpg)
