पूर्वपश्चिम राजमार्ग अन्तरगत दाङको देउखुरीमा बस दुर्घटना हुँदा घाइते भएका सहचालकको उपचारको क्रममा मृत्यु भएको छ।
कैलाली घोडाघोडी नगरपालिका १ निवासी २२ वर्षीय सहचालक अरूण चौधरीको उपचारका क्रममा बुटवलमा मृत्यु भएको जिल्ला प्रहरी कार्यालय दाङले जानकारी दिएको छ।
धनगढीबाट काठमाडौंतर्फ जाँदै गरेको ना ५ ख ५१८३ नम्बरको बस र विपरीत दिशाबाट आउँदै गरेको ना १ ख ४७९३ को ट्रकलाई शनिबार बिहान २ : ४० बजेतिर पूर्वपश्चिम राजमार्ग अन्तरगत राप्ती गाउँपालिका वडा नम्बर २ बराखुट्टीमा एक आपसमा ठोक्किएका थिए। दुर्घटनामा परी ११ जना घाइते भएका थिए।
प्रहरीका अनुसार बसको लापरबाहीले उक्त दुर्घटना भएको थियो।
बस गलत दिशाबाट गएर ट्रकसँग ठोक्किएको हुँदा बसको गल्ती देखिएको ईलाका प्रहरी कार्यालय भालुवाङका प्रमुख गंगाबहादुर सारुले बताए।
दुर्घटनामा परेकामध्ये ट्रकका चालक प्युठानको सुरमारानी गाउँपालिका वडा नं. ४ बड्डाँडा निवासी २७ वर्षीय विजय गाहाको दुवै खुट्टा फ्रयाक्चर भएको छ।
उक्त दुर्घटनामा परी बसमा यात्रारत यात्रु कैलाली गौरीगंगा नगरपालिका वडा नं. १० निवासी १९ वर्षीय प्रिति चौधरी र घोडाघोडी नगरपालिका वडा नं. १ निवासी १७ वर्षीया माया कुमारी उपाध्यायको स्थानीय मेडिकलमा प्रारम्भिक उपचारपछि थप उपचारको लागि बाँकेको कोहलपुर रिफर गरिएको छ।
