निकै समयपछि मंगलबार सिद्धार्थ बैंक र सानिमा बैंकको सेयर कारोबार बढ्यो।
यी दुवै बैंकको दैनिक सेयर कारोबार करिब दुई महिनायताकै उच्च भयो।
२०८२ कात्तिक १५ मा सिद्धार्थ बैंकको एकै दिन चार लाख ४३ हजार कित्ता सेयर किनबेच भयो। त्यसयता पहिलो पटक मंगलबार चार लाखभन्दा बढी कित्ता सेयर किनबेच भयो।
त्यस्तै, सानिमा बैंकको पनि मंगलबार तीन लाख ७६ हजार कित्ता सेयर किनबेच भयो। यो २०८२ असोज ५ यताकै उच्च हो। सो समय सानिमा बैंकको एकै दिन चार लाख ८७ हजार कित्ता सेयर किनबेच भएको थियो।
पछिल्लो समय यी दुई बैंकको सेयर कारोबार मात्र बढेको छैन, मूल्य पनि बढेको छ।
बुधबार सबभन्दा धेरैले मूल्य बढ्ने वाणिज्य बैंकहरूमा सिद्धार्थ दोस्रो र सानिमा तेस्रो स्थानमा छ। पहिलो स्थानमा कृषि विकास बैंक रह्यो।
पहिले कुरा गरौं सिद्धार्थ बैंकको।
मंगलबार सिद्धार्थको सेयर मूल्य पनि करिब चार वर्षयताकै उच्चसम्म पुगेको छ। २०७८ फागुन ३० मा सिद्धार्थको उच्च मूल्य ४१८ रूपैयाँ थियो।
मंगलबार ४१६ रूपैयाँसम्म मूल्य पुगे पनि बजार बन्द हुँदा ३८९ रूपैयाँ थियो। बुधबार प्रति कित्ता दुई रूपैयाँले बढेर तीन सय ९१ रूपैयाँमा अन्तिम कारोबार भएको छ।
सिद्धार्थले पाँच वर्षयता औसत ९.३८ प्रतिशत लाभांश दिएको छ। गत आर्थिक वर्ष २०८१–८२ का पाँच प्रतिशत बोनस र ५.५३ प्रतिशत नगद लाभांश दिएको छ।
सिद्धार्थको नाफा २०८२–८३ को पहिलो त्रैमासमा ३८ करोड रूपैयाँबाट घटेर ३२ करोड रूपैयाँ भएको छ। नाफा रकमका आधारमा सिद्धार्थ २० वाणिज्य बैंकमध्ये १६ औं स्थानमा छ।
लाभांश वितरण क्षमता एक अर्ब ६१ करोड रूपैयाँ थियो। बैंकले एक अर्ब ४१ करोड रूपैयाँ बराबरको लाभांश वितरण गरिसकेको छ।
सिद्धार्थले अहिले नै १३ करोड रूपैयाँको सेयर दिन सक्छ। यो भनेको अहिलेलाई एक प्रतिशतभन्दा कम हो। सिद्धार्थले वर्ष अन्त्यसम्म हुने कमाइको आधारमा दिने लाभांश परिवर्तन हुनेछ।
यसको दुई अर्ब आठ करोडबाट ब्याज आम्दानी बढेर दुई अर्ब १६ करोड रूपैयाँ पुगेको छ। फी, कमिसनबाट हुने आम्दानी पनि ३८ करोड रूपैयाँबाट बढेर ५१ करोड रूपैयाँ पुगेको छ।
सिद्धार्थको निस्क्रिय कर्जा ३.८० प्रतिशत छ। वाणिज्य बैंकहरूमध्ये यो १६ औं स्थानमा छ। यसले सिद्धार्थको कर्जा गुणस्तर राम्रो नै रहेको देखाएको छ। यसको प्रति सेयर आम्दानी नौ रूपैयाँ ०३ पैसा, प्रति सेयर नेटवर्थ दुई सय १८ रूपैयाँ छ।
सोमबारदेखि सिद्धार्थले लगातार बढेर सेतो मैनबत्ती आकृति बनाएको छ। यसलाई थ्री ह्वाइट सोल्जर्स भनेर पनि चिनिन्छ। हरेक दिन मूल्य बढेर अघिल्लो दिनको अन्तिम मूल्यभन्दा माथि पुग्दा बजार बन्द भएको यस्तो आकृति बन्छ। यसले मूल्य बढ्ने दरिलो संकेत गर्छ।
त्यस्तै सानिमा बैंकको सेयर बुधबार प्रति कित्ता सेयर तीन सय ३५ रूपैयाँ ५० पैसामा कारोबार भयो। यसको मूल्य गत असोजयताकै उच्च हो। गत असोज आठ गते सानिमाको मूल्य यही विन्दुमा थियो।
सानिमाले पाँच वर्षयता औसत ११.२४ प्रतिशत लाभांश दिएको छ। गत आर्थिक वर्ष २०८१–८२ का ७.३६ प्रतिशत नगद लाभांश दिएको छ।
सानिमाको नाफा २०८२–३ को पहिलो त्रैमासमा नाफा ८.३६ प्रतिशतले बढेर ४३ करोड रूपैयाँ पुगेको छ। धेरै वाणिज्य बैंकको नाफा घट्दा सानिमा नाफा बढ्नेमध्ये दोस्रो स्थानमा छ। सानिमाको नाफा १३ प्रतिशतले बढेको हो। नाफा रकमको आधारमा यो १३ औं स्थानमा छ।
यसको लाभांश वितरण क्षमता दुई अर्ब १३ करोड रूपैयाँ थियो। सानिमाले करिब एक अर्ब रूपैयाँ बराबरको लाभांश वितरण गरिसकेको छ।
सानिमाले लाभांश वितरणपछि बाँकी रकमबाट अहिले नै एक अर्ब १३ करोड रूपैयाँको सेयर दिन सक्छ। यो भनेको अहिलेलाई ८.३२ प्रतिशत हो। सानिमाले वर्ष अन्त्यसम्म हुने कमाइको आधारमा दिने लाभांश परिवर्तन हुनेछ।
यसको एक अर्ब ३२ करोडबाट खुद ब्याज आम्दानी बढेर एक अर्ब ६८ करोड रूपैयाँ पुगेको छ। फङ, कमिसनबाट हुने आम्दानी पनि २६ करोड रूपैयाँबाट बढेर ३० करोड रूपैयाँ पुगेको छ।
सानिमाको निस्क्रिय कर्जा ३.९१ प्रतिशत छ। वाणिज्य बैंकहरूमध्ये यो १४ औं स्थानमा छ।
यसले कर्जा असुलीमा सानिमाको अवस्था राम्रै देखाएको छ। यसको प्रति सेयर आम्दानी १३ रूपैयाँ १५ पैसा, प्रति सेयर नेटवर्थ एक सय ७२ रूपैयाँ छ।
तीन दिनमा सानिमाको सेयर मूल्यले साइड बाई साइड ह्वाइट लाइन बुलिस मैनबत्ती आकृति बनाएको छ। यो आकृतिमा सबै दिन सेतो मैनबत्ती बनेको हुन्छ।
पहिलो दिनको तुलनामा दोस्रो दिन मूल्य अघिल्लो दिनको अन्तिम मूल्यभन्दा माथिबाट कारोबार सुरू भएर माथि पुगेरै बन्द हुन्छ। तेस्रो दिन भने दोस्रो दिनको सुरू मूल्यैबाट कारोबार हुन थालेर मूल्य बढेरै बजार बन्द हुन्छ।
दोस्रो र तेस्रो दिनको मैनबत्तीको शरीरको आकार धेरै फरक हुँदैन। यसले मूल्य बढ्न सक्ने दरिलो संकेत गर्छ।
-1756446574.jpg)
-1746009348.jpg)
