कोरोनाभाइरसको संक्रमणबाट मृत्यु भएका पाँचौं व्यक्तिको पशुपतिस्थित शवगृहमा अन्त्येष्टि भएको छ।
बिहीबार साँझ ललितपुर महानगरपालिका-२२ बुङ्गमतीका ५६ वर्षीय पुरूषको पशुपतिस्थित विद्युतीय शव गृहबाट अन्त्येष्टि गरिएको महानगरीय प्रहरी वृत्त गौशालाका डिएसपी प्रदीप कुमार सिंहले जानकारी दिए।
'कोरोना संक्रमितको शव जलाउने कार्यविधि अनुसार नै काम भयो शव जलाउने काम जारी छ,' उनले भने।
पशुपति क्षेत्र विकास कोषका सदस्य सचिव प्रदीप ढकालले पनि संक्रमितको शव सहजै जलाइएको बताए।
'शव ल्याउँदा कर्मचारी भागेको भन्ने कुरा झूटो हो। शव जलाउने कर्मचारीहरू यहीँ क्वारेन्टिनमै बस्नुभएको थियो। उहाँहरूलाई नै बोलाएर शव जलाउने काम गरियो,' उनले भने, 'म पनि यहीँ छु कुनै समस्या छैन।'
उनका अनुसार शवगृहमा बिहान ६ बजेदेखि बेलुका ६ बजेसम्म काम गर्ने समय मिलाइएको छ।
बिहानदेखि काम गरेका कर्मचारी ६ बजे घर गएका हुन्। उनीहरू गएपछि मात्र शव आइपुगेकाले क्वारेन्टिनमा बसेका कर्मचारीलाई बोलाएर जलाइएको हो।
यसअघि मृत्यु भएकी सिन्धुपाल्चोककी संक्रमितलाई जलाएका शवगृहका कर्मचारी क्वारेन्टिनमा छन्। उनीहरूले नै ललितपुरका पुरूषलाई पनि जलाएको सदस्यसचिव ढकालले बताए।