नेकपा एमालेका नेता तथा रूपन्देहीको तिलोत्तमा नगरपालिकाका पूर्वमेयर वासुदेव घिमिरेले पार्टी परित्याग गरेपछि उनीप्रति विभिन्न टिकाटिप्पणी सुरू भएका छन्।
घिमिरेले मंगलबार साँझ सामाजिक सञ्जालबाट आफू एमाले पार्टीमा नरहेको घोषणा गरेपछि कतिपयले 'पटक पटक अवसर लिएर पार्टीलाई धोका दिएको' टिप्पणी गरेका छन्। कतिपयले भने राष्ट्रिय स्वतन्त्र पार्टी (रास्वपा) मा आउन आग्रह पनि गरिरहेका छन्।
२०७४ सालमा तिलोत्तमा नगरपालिकाको मेयर बनेका घिमिरेलाई 'हरित सहर' को अवधारणाले देशभर चर्चामा ल्यायो। त्यही लोकप्रियताकै बलमा उनले रूपन्देही क्षेत्र नम्बर ५ बाट प्रतिनिधिसभा सदस्यमा जित हासिल गरे। उनलाई एमालेले पनि 'ब्रान्ड' का रूपमा स्थापित गरिदियो।
तर दुई साताअघि सम्पन्न पार्टीको ११औं महाधिवेशनमा केन्द्रीय सदस्य पराजित भएपछि उनी पार्टी नै परित्याग गर्ने निर्णयमा पुगे।
घिमिरेको पार्टी परित्यागपछि उनको र काठमाडौं महानगरपालिकाका मेयर बालेन शाहको सम्बन्धबारे चर्चा भइरहेको छ। घिमिरेको एमाले परित्याग धेरैलाई 'सरप्राइज' जस्तो लागे पनि नजिकबाट चिन्नेहरू भने उनी धेरै पहिलेदेखि बालेन शाहसँग निकट रहेको र बालेनले राजनीतिक दल खोलेको वा अन्य कुनै दलमा प्रवेश गरेको खण्डमा घिमिरे पनि त्यतै लाग्ने तयारीमा रहेको बताउँदै आएका थिए।
संयोग नै भनौं, बालेन रास्वपा प्रवेश गरेको दुई दिनपछि घिमिरेले पनि एमाले परित्याग गरे। उनी अहिले कुनै पार्टी प्रवेश गरिसकेका छैनन्। तर रास्वपाले रूपन्देही क्षेत्र नम्बर २ बाट चुनाव लड्ने गरी पार्टीमा आउन आग्रह गरेको उनले बताएका छन्।
आफूलाई राजनीतिक रूपमा हुर्काएर मेयर र संघीय संसदको उचाइमा पुर्याएको पार्टी परित्याग गर्ने निर्णयमा घिमिरे कसरी पुगे? हामीले यसै विषयमा घिमिरेसँग कुराकानी गरेका छौं।
अकस्मात् एमाले छाड्नुपर्ने अवस्था कसरी आयो?
अकस्मात् पार्टी छाडेजस्तो देखिए पनि मलाई भदौ २३ को घटनापछि नै अब एमालेमा बस्नु हुँदैन भन्ने महसुस भइसकेको थियो। त्यस दिन जेनजीहरूको आन्दोलनमाथि सरकारले जसरी निर्ममतापूर्वक गोलीको वर्षा गरायो, त्यसले मलाई विक्षिप्त बनाएको थियो। मैले सरकारमा रहेका मन्त्रीहरू र पार्टीका केही माथिल्लो तहका नेतालाई प्रधानमन्त्रीले राजीनामा दिएर परिस्थिति सामान्य बनाउन पहल गर्नुस् भनेर आग्रह गरेको थिएँ।
त्यो दिन प्रधानमन्त्रीको राजीनामा नआएपछि २४ गते देशभर आगजनी र तोडफोड भयो। मैले सामाजिक सञ्जालबाटै भए पनि प्रधानमन्त्रीको राजीनामा मागेको थिएँ।
मलाई पनि धेरै ठाउँबाट पार्टी र सांसदबाट राजीनामा दिन दबाब आइरहेको थियो। अब यही सरकार र पार्टीको नेतृत्व बोकेर हिँड्न सकिन्न भन्ने लागेर राजीनामा लेखेर नजिकका केही आफन्तसँग सल्लाह गरेँ। तर उहाँहरूले अहिलेको अवस्था सधैं रहँदैन भनेर पार्टी छाड्न नहतारिन सल्लाह दिए। अहिले ढिलै भए पनि उपयुक्त समयमा पार्टी परित्याग गरेको हुँ।
१५ दिन पहिलेसम्म एमालेको केन्द्रीय सदस्यका लागि उम्मेदवार बन्नुभएको थियो, त्यहाँ पराजित भएपछि पार्टी छाड्नुभएको हो?
मैले एमाले छाडेँ भनेर सामाजिक सञ्जालमा लेखेपछि अहिले त्यस्तो चर्चा गर्न थालिएको छ। तर नेतृत्व चयनमा जसरी नाटक मञ्चन गरियो, म आफू केन्द्रीय सदस्य निर्वाचित भएको भए पनि एमालेमा बस्न सक्ने अवस्था थिएन। मैले पार्टी परित्याग गर्थेँ नै।
महाधिवेशनमा लोकतान्त्रिक प्रक्रियाबाट नेतृत्व चयन गरियो भनिए पनि नेतृत्वमा रहेकाहरूले बनाएको लिस्टबाटै नेतृत्व चयन भएको हो। यस्तो प्रवृत्तिले पार्टी कहिल्यै सुध्रिँदैन भन्ने लाग्यो।
दस वर्षसम्म यिनै अनुहार आउने, नेतृत्व कहिल्यै नसुध्रिने र तल्लो तहका नेता–कार्यकर्तालाई सधैं बेवास्ता गर्ने प्रवृत्ति देखेपछि पार्टी नेतृत्वले गर्ने गलत कामको फड्के किनाराको साक्षी बस्नुभन्दा अलग हुनु नै उचित ठानेर पार्टी छाड्ने निर्णय गरेको हुँ।
तपाईं एमालेबाटै तिलोत्तमाको पहिलो मेयर निर्वाचित हुनुभयो, क्षेत्र नम्बर ५ बाट संघीय सांसद हुनुभयो, पार्टीबाट अवसर पाइनँ भन्न मिल्छ र?
म एमालेबाट राजकीय भूमिकामा पुगेर पाएको भन्दा धेरै गुमाएको छु। मलाई पार्टीले अवसर दिएको भन्नुभन्दा पार्टीका लागि मैले जे–जति गरेँ, त्यसैको प्रतिफल स्वरूप तिलोत्तमाको मेयर र संघीय सांसदको भूमिकामा पठाएको थियो। त्यहाँ गएर पनि मैले लाभ लिनभन्दा धेरै गुमाएको छु।
त्यो पार्टीमा मैले पनि धेरै लगानी गरेको छु। मजस्ता धेरैले योगदान गरेका छन्। तर पार्टीमा केही मान्छेले कुनै पनि योगदान नगर्ने, योगदान गर्नेले गरेको गर्यै गर्नुपर्ने, लाभ लिनेले सधैंभरि लिने प्रवृत्ति कहिल्यै हटेन। योगदान गर्नेहरूले सधैंभरि कर्मी मौरीले जस्तै लगानी गरिरहनुपर्ने, तर माथिल्लो नेतृत्वले ढाडे मौरीले जस्तै खाएर बसिरहने प्रवृत्ति कहिल्यै सुध्रिएन।
पार्टीले गरेका गलत कामबारे पार्टीमा रहँदा पनि भन्न सक्नुहुन्थ्यो नि?
मैले धेरै पटक पार्टीका गलत क्रियाकलापबारे सार्वजनिक रूपमै आवाज उठाएको थिएँ। म मात्र होइन, धेरै नेता–कार्यकर्ताले आवाज उठाउनुभयो। तर सुनुवाइ भएन।
कार्यकर्ताले आवाज उठाइरहने, नेतृत्व पंक्तिले सुनुवाइ नगर्ने भएपछि पहिलेदेखि नै पार्टीप्रति असन्तुष्टि बढिरहेको थियो। त्यही पनि सुधार्न सकिन्छ कि भनेर धेरै पहल गरियो। पार्टीका बैठकहरूमा, नेतृत्वसँगको भेटमा र सामाजिक सञ्जालबाट समेत धेरै पटक पहल गरे पनि सुधार्न सकिएन।
मैले मेयर हुँदा तिलोत्तमामा विकास र सुशासनको जग बसालेको थिएँ। सांसद भएपछि पनि आफ्नो क्षेत्रबाट गर्न सक्ने भूमिका निर्वाह गर्दै आएको थिएँ। पार्टीभित्र, संसदीय दलका बैठक र सदनबाट पनि धेरै पटक जनताको पक्षमा आवाज उठाउँदै आएको थिएँ। कति कुरा सुनुवाइ हुन सके, कति कुरा सकेनन्, त्यो मेरो हातमा थिएन। तर जति गर्न सक्ने थिएँ, गरेँ भन्ने लाग्छ। अब भने युवाहरूको भावना सम्बोधन गर्न पनि मैले एमालेबाट राजीनामा दिनुपर्छ भनेर राजीनामा दिएको हुँ।
तपाईं पहिलेदेखि नै बालेन शाहसँग निकट हुनुहुन्थ्यो, बालेनले दल खोलेपछि त्यतै जानुहुन्छ भन्ने चर्चा पनि थियो नि?
युवाहरूको भावना सम्बोधन गरेर मुलुकलाई अगाडि बढाउन अब पुराना दलले सक्दैनन्, नयाँ ऊर्जा, जोस र जाँगर बोकेका युवा र दलले मात्र पूरा गर्न सक्छन् भन्नेमा म विश्वस्त छु। तर कुनै नयाँ पार्टीमा गएर सांसद बन्ने, मेयर बन्ने सपना देखेको छैन।
बालेन शाहसँग तपाईं पहिलेदेखि नै सम्पर्कमा हुनुहुन्थ्यो भन्ने चर्चा थियो, बालेनसँग कहिले र कसरी भेट भएको थियो?
म तिलोत्तमा नगरपालिकाको मेयर भएको बेला २०७७ सालतिर हुनुपर्छ, हाम्रो पहिलो पटक भेट भएको थियो। उहाँले त्यति बेला काठमाडौंको मेयर उठ्ने तयारी गर्नुभएको रहेछ। तिलोत्तमामा विकास निर्माणका काम कसरी भएका छन्, म पनि काठमाडौंको मेयर उठ्ने तयारीमा लागिरहेको छु, नेटवर्क विस्तार गरिरहेको छु, तपाईंले कसरी काम गरिरहनुभएको छ, अप्ठ्याराहरू के के रहेछन् भनेर बुझ्न आउनुभएको थियो।
पहिलो पटक हामीले नगरपालिकाको मेरो कार्यकक्षमै बसेर दुई घन्टाभन्दा बढी समय छलफल गरेका थियौं। मैले तिलोत्तमामा त्यति बेला हरियाली प्रवर्द्धन र फोहोर व्यवस्थापनलाई प्राथमिकता दिएर काम गरिरहेको थिएँ। पहिलो पटकको भेटमै धेरै छलफल भएका थिए। त्यसपछि पनि टेलिफोनमा नियमित कुराकानी हुने गर्थे। म काठमाडौं गएका बेला पनि भेटघाट हुन्थ्यो।
२०७९ सालमा म प्रतिनिधिसभा सदस्य उम्मेदवार भएका बेला मौन अवधि सुरू हुनुभन्दा एक दिन पहिले उहाँ आफै लुम्बिनी आएर भेटघाट र छलफल गरेर जानुभएको थियो। निर्वाचनपछि म संसदमा व्यस्त भएँ, उहाँ महानगरपालिकामा व्यस्त हुनुभयो। टेलिफोनमा हाम्रो कुराकानी भइरहे पनि भेटघाट त्यति हुन पाएको थिएन। एक–दुई पटक उहाँकै कार्यकक्षमा भेटघाट भएको थियो।
डेढ वर्षअघि उहाँ निकटका केही साथीहरू मिलेर लुम्बिनी फुटबल क्लब स्थापना गर्नुभएको थियो। मलाई त्यसमा संरक्षक राख्नुभएको थियो। त्यसले पनि एकअर्कामा भेटघाट गर्ने वातावरण बनेको थियो। तर क्लब अगाडि बढ्न सकेन।
एमाले परित्यागपछि अब तपाईं पनि बालेनसँगै रास्वपा प्रवेश गर्नुहुन्छ भन्ने चर्चा छ नि?
एमाले परित्याग गरेपछि आजसम्म म कुनै पनि दलमा गएको छैन। उहाँहरू (बालेन) ले रूपन्देही क्षेत्र नम्बर २ बाट चुनाव उठ्नुपर्छ भन्नुभएको छ। तर मैले कुनै जबाफ दिएको छैन। भोलिको कुरा के हुन्छ, कहाँ भइन्छ, अहिले भन्न सक्ने कुरा भएन।
-1746009348.jpg)
