पर्साको मालपोत कार्यालयमा जिल्ला प्रशासन कार्यालयले छापा मारेको छ।
बिहीबार राति अबेर सम्म कार्यालयमा बसेर कर्मचारी तथा विचौलियाहरूले अवैध काम गरिरहेको भन्ने सूचनाका आधारमा प्रहरीले छापा मारेको हो।
प्रमुख जिल्ला अधिकारी आस्मान तामाङका अनुसार सवा आठ बजे उक्त कार्यालयमा छापा मारिएको हो।
त्यहाँबाट आठ जना बिचौलियालाई पनि नियन्त्रणमा लिइएको उनले बताए। प्रशासनको टोली मालपोत कार्यालय पुग्दा १३ जना कर्मचारी रहेको तामाङले बताए।
'कार्यालय समय भन्दा बाहिर बिना विभागीय अनुमति बिचौलियाहरूको साथमा कार्यालय सञ्चालन भइरहेको भन्ने सूचना पायौं,' उनले भने ,'त्यसपछि तुरून्तै हामीले सहायक प्रजिअ र प्रहरीको टोली जानुभयो।'
त्यहाँबाट १२ हजार २ सय ५५ रूपैयाँ पनि बरामद भएको छ। प्रजिअ तामाङका अनुसार एक हजार, पाँच सय, एक सयका नोटहरू फाइलमै भेटिएको हो।
'हामीले कर्मचारीहरूसँग बयान लिएर थप अनुसन्धान अघि बढाएका छौं,' प्रजिअ तामाङले भने, 'पक्राउ परेका बिचौलियाहरूबाट पनि बयान लिएर थप अनुसन्धान अघि बढ्छ।'