तुलसीपुर उपमहानगरपालिकाले छोरीहरूको आर्थिक र सामाजिक सशक्तिकरणका लागि जन्मेदेखि हरेक महिना १ सयका दरले बैंक खातामा रकम जम्मा गर्ने भएको छ।
कार्यपालिकाको ९५ औं बैठकले स्मार्ट छोरी विहेबारी २० वर्षपारी कार्यविधि पारित गर्दै यस्तो व्यवस्था लागु गरेको हो।
कार्यक्रम सञ्चालनका लागि उपमहानगरपालिकाले चालु आर्थिक वर्षमा वजेट समेत विनियोजन गरिसकेको नगर प्रमुख घनश्याम पाण्डेले बताए।
कार्यविधिमा उल्लेख भए अनुसार २०७७ साउन १ गतेपछि जन्मिएका उपमहानगरपालिका भित्रका हरेक छोरीहरूको बैंक खातामा रकम जम्मा हुने उपप्रमुख माया शर्माले जानकारी दिइन्।
कार्यविधि केही ढिला पारित भएको भएपनि पहिलेदेखि नै यो कार्यक्रम लागु हुने उनको भनाइ छ।
कार्यविधिका अनुसार कार्यक्रममा समावेश हुनका लागि अभिभावकले छोरी जन्मिएको ३५ दिन भित्रमा अनिवार्यरुपमा जन्मदर्ता गराएको हुनुपर्नेछ।
जन्म दर्ता अनिवार्य गर्नुपर्नेमा कतिपय अभिभावकले ढिला गर्ने गरेको भन्दै ३५ दिन भित्र गरिदिन शर्माले आग्रह गरेकी छन्।
त्यसका साथै अभिभावकले बैंकमा खाता खोलेर खाता नम्वर उपमहानगरपालिकालाई उपलब्ध गराउनु पर्नेछ।
कार्यविधिमा उल्लेख भए अनुसार जन्मेको पहिलो महिनामा एक हजार दुई सय रुपँया र त्यसपछि हरेक महिना एक सयका दरले खातामा रकम जम्मा हुने उपमेयर शर्माले जानकारी दिइन्।
उपमहानगरपालिकाले बालिकाको नाममा खोलेको खातामा अभिभावकले समेत रकम जम्मा गर्न सक्ने व्यवस्था गरिएको छ। बालिका २० वर्ष पुगेपछि मात्रै उक्त रकम निकाल्न मिल्ने व्यवस्था गरिएको छ।
कार्यविधि अनुसार २० वर्ष नपुग्दासम्म विहे नगरेको र अनिवार्यरुपमा माध्यमिक तहसम्म अध्यापन गरेको हुनुपर्नेछ।
बीचमै विवाह गरेमा या माध्यमिकतहसम्म पढेको नभएमा रकम सरकारी खातामा फिर्ता हुने प्रावधान छ।
मेयर पाण्डेले तत्काललाई मासिक एक सय रुपैंया जम्मा गर्न थालिएको भएपनि भविष्यमा कार्यविधि परिवर्तन गरेर आवश्यकता अनुसार रकम बढाउन सकिने बताए।
कार्यविधि अनुसार कथमकदाचित समय अगावै बालिकाको मृत्यु भएमा, गम्भीर प्रकृतिको रोग लागेर माध्यमिक तह पुरा गर्न नसकेमा, संरक्षकको मृत्यु भई आर्थिक कठिनाई भएको खण्डमा त्यतिबेला सम्मको पुरै रकम बैंक खातामा उपमहानगरले जम्मा गरिदिने प्रावधान राखिएको मेयर पाण्डेले बताए।
तस्विर – नारायण खड्का
-1746009348.jpg)
