चुनावको बिदा सुरू हुनुअघि सेयर बजार बढेको थियो।
बिदाभन्दा अघिल्ला दुई दिनमा नेप्सेले ५७.५६ अंक जोडेको थियो। योसँगै करिब एक महिनामा नेप्से पुनः २७०० विन्दुमा उक्लिन सफल भएको थियो।
त्यसअघिसम्म निर्वाचन हुने कि नहुने भन्ने अलमल सेयर बजारमा पनि देखिएको थियो। त्यसै कारण बजार घटेको पनि थियो।
अहिले निर्वाचन सफलतापूर्वक सम्पन्न भएको छ। मत परिणामहरूले एउटै दलले एकल सरकार बनाउन सक्ने देखाएको छ।
यसो हुँदा बजार बढ्छ भन्ने धेरैको अपेक्षा रहेको सेयर विश्लेषक सुवासचन्द्र ढुंगाना बताउँछन्।
'यसअघिका निर्वाचनमा कुनै एउटा दलले बहुमत ल्याउँदा बजार बढेको देखिएको थियो। अहिले पनि यही प्रवृत्ति देखिन सक्छ,' उनले भने।
जुन दल निर्वाचित भए पनि स्थिर सरकार बन्ने कुराले बजारमा सधैं सकारात्मक प्रभाव पार्ने ढुंगाना बताउँछन्।
यसअघिको प्रवृत्ति हेर्ने हो भने पनि चुनावको समयमा बजार बढ्छन्। बहुमत सहितको सरकार बन्दा बजार थप सकारात्मक बनेको देखिएको छ।
२०५६ सालमा कांग्रेसले बहुमत ल्याउँदा बजार २०६ विन्दुबाट बढेर ५१९ मा पुगेको थियो। त्यस्तै, २०६४ सालमा माओवादीले बहुमत ल्याउँदा पनि बजार ३५५ विन्दु आसपासबाट नेप्से ६८३ विन्दुसम्म पुगेको थियो।
सशस्त्र द्वन्द्वरत पक्ष नै सरकारमा आउँदा मुलुकले निकास पाएको भन्दै लगानीकर्ताहरू सकारात्मक भएका थिए। २०६५ सालमा नेप्सेले त्यस समयकै सबभन्दा उच्च विन्दु, ११७५ भेटेको थियो।
सेयर बजारमा राजनीतिक प्रभाव पर्ने कुरा यसअघि नेप्सेमा देखिएको प्रतिक्रियाले पनि स्पष्ट पार्छ।
तर यस्तो राजनीतिक प्रभाव लामो समय रहँदैन।
समय अन्तरालमा विकसित हुँदै जाने राजनीतिक घटनाक्रम, बजारसँग सम्बन्धित नीतिगत सुधार, बैंकहरूको ब्याजदर, पुँजी उपलब्धता र सूचीकृत कम्पनीहरूको वित्तीय अवस्थामा हुने परिवर्तनले बजारलाई प्रभाव पार्दै लान्छ।
अहिले नेप्सेमा देखिएको प्रवृत्तिले बजार तत्काल बढ्नसक्ने सम्भावना छ।
नेप्सेमा हालै 'गोल्डेन क्रस ओभर' भएको छ। लामो अवधिको प्रवृत्ति विश्लेषणमा प्रयोग हुने मुभिङ एभरेज रेखाले यस्तो देखाएको हो।
५० दिने मुभिङ एभरेज रेखाले २०० दिने रेखालाई काटेर माथिमा लागेमा गोल्डेन क्रस ओभर भएको मानिन्छ। यसले बजार केही समयसम्म बढ्न सक्ने दरिलो संकेत गर्छ।
फागुन १७ गते आइतबार र १९ गते मंगलबार नेप्सेमा तल्लो लामो धागो भएको मैनबत्ती आकृति बनेको छ। यी दिन बजार परिसूचक नेप्से निकै तलसम्म ओर्लिए पनि बजार बढ्छ भन्ने लगानीकर्ताहरू हावी हुँदा हरियो मैनबत्ती आकृति बनेको हो।
लगानीकर्ताहरूको मनोविज्ञान संकेत गर्ने यी आकृतिले बजार प्रवृत्तिलाई लिएर लगानीकर्ताहरू सकारात्मक रहेको संकेत गरिरहेको छ।
यसै कारण तत्काल केही समय बजार बढ्न सक्ने सम्भावना देखिएको छ।
-1746009348.jpg)
