आइसिसी टी-२० विश्वकप २०२६ को उपाधि भारतले जित्यो। आइतबार अहमदावादको नरेन्द्र मोदी स्टेडियममा न्युजिल्यान्डलाई ९६ रनको फराकिलो अन्तरले पराजित गरेपछि भारत लगातार दोस्रो पटक र समग्रमा तेस्रो पटक टी-२० विश्व विजेता बन्यो।
पहिले ब्याटिङ गरेको भारतले ५ विकेटको क्षतिमा २५५ रन बनाएको थियो। जवाफी ब्याटिङ गरेको न्युजिल्यान्ड १५९ रनमै अलआउट भयो।
न्युजिल्यान्डका बलरविरूद्ध भारतका ब्याटरहरू आक्रामक रुपमा प्रस्तुत भएका थिए। लगातार चौका र छक्काको वर्षा गरिरहेको बेलमा न्युजिल्यान्डका लागि १६औं ओभरमा जिम्मी निशमले तीन विकेट लिएपछि केही राहत भएको थियो। सो ओभरमा जिम्मीले इशान किसन, सन्जु सामसन र सूर्यकुमार यादवलाई आउट गरेका थिए। यद्यपी अन्तिम ओभरमा निशमलाई शिवम दुवेले ३ चौका र २ छक्का प्रहार गर्दै २४ रन जोडेका थिए।
निशमले तीन विकेट लिएपछि नेपाल प्रिमियर लिग (एनपिएल) टोली पोखरा एभेन्जर्सले बधाइ दियो। किनभने निशनले गत मंसिरमा भएको दोस्रो संस्करणमा पोखराबाट खेलेका थिए।
पोखराले विश्वकप फाइनलमा उत्कृष्ट प्रदर्शन गरेको भन्दै प्रशंसा गर्दै दोस्रो संस्करणको एनपिएल आफ्नो टोलीबाट खेलेको विषय गर्व लायक भएको बताएको थियो।
सो पोस्टमा निशमले कमेन्ट गर्दै आफूले पोखारबाट अझै पनि पारिश्रमिक नपाएको संकेत गरेका छन्।
उनले लेखेका छन्, ‘कुल, पे योर प्लेयर्स (तिम्रा खेलाडीलाई पारिश्रमिक देउ)।’
निशमले प्रतिक्रिया दिएपछि नेपाल क्रिकेट संघ (क्यान) ले चासो ब्यक्त गर्दै पोखरा व्यवस्थापनलाई समेत सोधेको छ।
पोखराका एभेन्जर्सका मुख्य लगानीकर्तामध्येका एक सुबोध त्रिपाठीले निशमको पारिश्रमिक दिन पोखरा तयार भए पनि नेपालको प्रशासनिक प्रक्रियाको ढिलाइले समस्या भएको बताए।
‘हामीलाई खेलाडीको पारिश्रमिक दिन कुनै समस्या छैन। तर नेपालको प्रकियागत कुराले ढिलाइ भएको पक्का हो,’ त्रिपाठीले सेतोपाटीसँग भने, ‘सुरुमा राष्ट्र बैंकको अनुमति नचाहिने भनियो। तर हामीले करोबार गर्ने ग्लोबल आइएम बैंकले चाहिन्छ भन्यो। त्यसपछि हामी राष्ट्रिय खेलकुद परिषदमा गयौ। तर परिषदले मुद्दाको विषय लिएर अनुमति दिन ढिलाइ गरेको छ। बीचमा निर्वाचनका कारण कार्यालय बन्द भयो। हामी पारिश्रमिक दिने प्रक्रियामा छौ।’
-1746009348.jpg)
