प्रदेश आयुर्वेद अस्पताल सुर्खेतमा कार्यरत् दुई जना डाक्टरमाथि हातपात भएको छ।
अस्पतालका इञ्चार्ज समेत रहेका डा. शंकरप्रसाद रिजाल र डाक्टर यादवप्रसाद उपाध्यायमाथि बिहीबार बेलुका हातपात भएको हो।
उनीहरूमाथि हातपात गर्ने तीन जना पक्राउ परेका छन्। ती सबै १८ वर्षमुनिका रहेको जिल्ला प्रहरी कार्यालय सुर्खेतका प्रवक्ता प्रहरी नायब उपरीक्षक रामप्रसाद घर्तीले जानकारी दिए।
उनका अनुसार वीरेन्द्रनगर-४ भैरवस्थान बस्ने वर्ष १६, वीरेन्द्रनगर-२ कोलडाँडाका वर्ष १७ र वीरेन्द्रनगर-४ बस्ने वर्ष १६ का किशोरलाई प्रहरीले नियन्त्रणमा लिएको छ।
डा. रिजाल अस्पतलबाट घर जान लागेका थिए भने उपाध्याय अफिस जान लागेका थिए। उनीहरू दुबै जना एकैठाउँमा भेटिएकाले जम्काभेट भएका तीन जनाले हातपात गरेका हुन्।
हातपात गर्नुको कारण भने खुलेका छैन। हातपात गर्नेहरूले अत्यधिक मदिरा सेवन गरेको पाइएको प्रहरीले जनाएको छ।
हातपात गर्नेविरूद्ध डाक्टरहरूले जााहेरी दिएका छन्।
