गायिका जेरूसा राई चार दिनदेखि हराइरहेकी छन्।
भदौ ६ गते बेलुकी घरबाट निस्किएकी जेरूसाको खोजी भइरहे पनि उनी कहाँ गइन् भन्ने खुल्न नसकेको प्रहरीले जनाएको छ। गत बिहीबार बेलुकी साढे सात बजे कसैलाई केही नभनी घरबाट निस्किएकी छोरी फेला नपरेको उनकी आमा इश्का घिमिरेले बताइन्।
गत असार २७ गते अमेरिकाबाट नेपाल आएकी जेरूसा ललितपुरको धोविघाटमा आमासँग बस्दै आएकी थिइन्।
आमा इश्काले घरमा सानो नोट पनि भेटेकी थिइन्। त्यसपछि प्रहरीमा उजुरी दिएको उनले बताइन्।
जिल्ला प्रहरी परिसर ललितपुरका प्रहरी उपरीक्षक सूर्यविक्रम शाहीका अनुसार जेरूसाको खोजी कार्य भइरहेको छ।
‘हामीले उनको खोजी कार्यलाई तीव्र पारेको छौं,’ उनले भने, ‘उनको फोटोसहित उपत्यका प्रहरी र नेपालभर प्रहरीलाई खोजीका लागि पत्राचार गरेका छौं।’
*सम्पादन गरिएको
