अख्तियार दुरूपयोग अनुसन्धान आयोगले हुम्लामा खानेपानी ट्याङ्की बनाउँदा ६ लाख ४८ हजार ७ सय ८६ रुपैयाँ भ्रष्टाचार गरेको भन्दै प्रमुख प्रशासकीय अधिकृतमाथि मुद्दा दायर गरेको छ।
चंखेली गाउँपालिका वडा नम्बर २ देवकोटाबाडास्थित खानेपानी ट्याङ्की बनाउन आर्थिक वर्ष २०७८/०७९ मा मुख्यमन्त्री स्वरोजगार कार्यक्रमअन्तर्गत बजेट बिनियोजन भएको थियो।
उक्त ट्याङ्की उपभोक्ता समितिलाई निर्माणको जिम्मा दिइएको थियो। तर आधा काम बाँकी हुँदा ट्याङ्की निर्माणको काम सकियो भनेर प्रमुख प्रशासकीय अधिकृत विष्णुबहादुर शाहीले फर्जी बिल भरपाई पेश गरेर सबै रकम निकासा गरी हिनामिना गरेको अख्तियारको आरोप छ।
नभएको कामलाई भएको भन्दै ६ लाख ४८ हजार ७ सय ८६ रुपैयाँ हानीनोक्सानी पुर्याएको शाहीमाथि आरोप छ।
साथै इन्जिनियर मानबहादुर ऐडी, सबइन्जिनियर गोभधन बोहरा र लेखापाल नवीन रेग्मीमाथि पनि अख्तियारले मुद्दा दायर गरेको छ। उनीहरूले नभएको काम पनि भएको भन्दै प्रतिवेदन दिएका थिए।
साथै वडा नम्बर २ का तत्कालीन वडाध्यक्ष हरिहर उपाध्याय, देवकोटाबाडा खानेपानी ट्याङ्की निर्माण उपभोक्ता समिति अध्यक्ष गोपाल विश्वकर्मा, सचिव प्रयोगलाल जैसी, कोषाध्यक्ष नन्दादेवी देवकोटा धिताललगायतलाई पनि अख्तियारले मुद्दा दायर गरेको छ।
