ललितपुरमा सुनको सिक्री लुटपाट गर्ने तीन जनालाई प्रहरीले पक्राउ गरेको छ।
जिल्ला प्रहरी परिसर ललितपुरले तीन जनालाई पक्राउ गरेको एसएसपी सिद्धीविक्रम शाहले जानकारी दिए। पक्राउ पर्नेहरूलाई मंगलबार पत्रकार सम्मेलन गरी सार्वजनिक गरिएको हो।
ललितपुर महानगरपालिका-११ लुकुसी बस्ने ३२ वर्षीय लोलिनकाजी महर्जन, ललितपुरको सुन्धारा बस्ने ३१ वर्षीय रवीन्द्र शाक्य र काठमाडौं-२४ नरदेवी बस्ने ३३ वर्षीय रोहन नेपालीलाई प्रहरीले पक्राउ गरेको हो।
उनीहरूले सिक्री लुटपाट गर्न चार पटक प्रयास गरेको एसएसपी शाहले बताए। जसमा दुई पटकमात्रै सफल भएका छन्।
यसरी सिक्री लुट्ने समूहमा प्रमुख व्यक्ति लोलिनकाजी छन्। अरू दुई जना भने सवारी चालक हुन्।
सिक्री लुट्न प्रयोग गरेको बा २९ प १५६२ नम्बरको पल्सर बाइक र बा ९९ प ३६२८ नम्बरको स्कुटर र एउटा १२.५ ग्राम सुनको सिक्री प्रहरीले बरामद गरेको छ।
यो समूहले गत असार १७ गते ललितपुरमा दुई पटक लुटपाटको प्रयास गरेको थियो। तर उनीहरूले त्यसदिन लुट्न सकेनन्। उनीहरू अपराह्न सवा ४ बजे पैदल हिँडिरहेकी पेम्बाकुमारी तामाङ र मिना शाक्यको सिक्री लुट्ने प्रयास गरेका थिए।
त्यसपछि उनीहरूले असार १८ गते अपराह्न पौने ५ बजे वडा-११ चाकुपात बस्ने ममता बज्राचार्यको सिक्री लुटेका थिए। असार १९ गते पनि अपराह्न साढे ४ बजे धोबिघाट बस्ने सारिका कुशवाहाको सिक्री लुटेका थिए।
‘उनीहरूले विशेषगरी विद्यालयबाट आफ्ना बच्चा लिएर फर्किने आमाहरूलाई निशानामा राखेको पायौं,’ एसएसपी शाहले भने, ‘बच्चा भएपछि समाउन पनि गाह्रो हुने भएकाले त्यस्तो गरेको देखियो।’
यसरी सिक्री लुटेर भागेको भन्ने उजुरी परेपछि परिसरले अनुसन्धान अघि बढाएको थियो। नजिकका सिसिटिभी फुटेजलाई केलाएर प्रहरीले सुरूमा दुई जनालाई पक्राउ गरेको थियो।
लुटपाट गर्ने लोलिनकाजी र रवीन्द्रलाई प्रहरीले आइतबार नै पक्राउ गरेको थियो। तर मोटरसाइकल चालक रोहन भने फरार थिए।
काठमाडौं उपत्यका अपराध अनुसन्धान कार्यालयले पनि आइतबार नै सिक्री लुटपाट गर्ने समूहका पाँच जनालाई पक्राउ गरेर सार्वजनिक गर्यो। तर त्यसमा रोहन थिएनन्।
कार्यालयले पत्रकार सम्मेलन नै गरेपछि यता ललितपुरका अभियुक्त झन् सतर्क भएर भाग्ने पो हो कि! भनेर प्रहरी अधिकारीहरू चिन्तित थिए।
त्यसैबीच प्रहरीले रोहनलाई पक्राउ गर्न जुक्ति लगायो। प्रहरीले लोलिनकाजीले रोहनलाई फोन गर्न लगाएका थिए।
लोलिनकाजीले रोहनलाई फोन गरेर भने- सिक्री लुट्नेहरू काठमाडौंमा पक्राउ परेका रहेछन्। भिडिओहरू आइरहेका छन् फेसबुकमा हेर त।
प्रहरीले पनि उनलाई पक्राउ गर्ने मौका यही हुन सक्छ भनेर हेरेको थियो।
‘कुरा गर्दा उसले फेसबुक हेर भनेर हेर्न भन्न लगायौं। रोहनले हेरेपछि काठमाडौंमा त ड्युक बाइक हो हाम्रो हैन भनेर भने। त्यसपछि लोलिनकाजीलाई फेरि भेट्न पर्छ भन्न लगायौं,’ एसएसपी शाहले भने।
सुरूमा भेट्ने कुरा गर्दा रोहनले महाराजगन्जमा बोलाएका थिए। तर पछि काठमाडौंको सुन्धारामा भेट्ने सहमति भएको थियो।
मंगलबार बिहान भने सुन्धारामा बोलाएको ठाउँमा ललितपुरका प्रहरी पनि तैनाथ थिए। रोहन आएको देख्नबित्तिकै प्रहरीले उनलाई पक्राउ गरी ललितपुर ल्याएको हो।
एसएसपी शाहका अनुसार लोलिनकाजीविरूद्ध ९ वटा कसुरमा मुद्दा चलिसकेको छ। दुई वटा लागुऔषध र ७ वटा चोरीकै घटनामा मुद्दा चलेको उनले बताए।
रोहनले भने चोरी र लागुऔषध प्रयोग गर्ने गरे पनि पहिलो पटक पक्राउ परेका हुन्।
उनीहरू तीनै जनामाथि अनुसन्धान गर्न जिल्ला प्रहरी परिसर ललितपुरले जिल्ला अदालतबाट ७ दिनको अनुमति लिएको छ।
