धनुषामा एक प्रहरी जवानमाथि बालिकालाई यौन दुर्व्यवहार गरेको आरोप लागेको छ।
लालगढ प्रहरी चौकीका जवान रुपेश चौधरीले मंगलबार राति करिब १० बजेतिर स्थानीय १४ वर्षीया बालिकालाई यौन दुर्व्यवहार गरेको जिल्ला प्रहरी कार्यालयले धनुषाले जनाएको छ।
मदिरा सेवन गरेर हिँडेका उनले बालिकालाई 'केही कुरा भन्नू छ' भन्दै बोलाएर यौन दुर्व्यवहार गरेको जिल्ला प्रहरी कार्यालयका एक प्रहरीले बताए।
आरोपी प्रहरी जवान चौधरीलाई प्रहरीले संरक्षण गर्न खोजेको भन्दै मिथिला नगरपालिका-९ ललागढ स्थित प्रहरीचोकी घेर्दै स्थानीयले राजमार्ग समेत अवरुद्ध गरेका छन्। स्थानीयले आधा घण्टा राजमार्ग अबरुद्ध गरेका थिए।
`राति नै ती प्रहरी जवानलाई प्रहरी अधिकृतको उपस्थितिमा सार्वजनिक रुपामा माफी माग्न लगाउनुपर्छ र कारबाही प्रक्रिया अगाडि बढाउनुपर्छ भन्ने कुरा भएको थियो। उनलाई मेडिकल परिक्षणका गराएर ल्याउने भनेर यहाँबाट लगियो तर नल्याएपछी स्थानीय आन्दोलित भएका हुन,´ वडा नम्बर ९ का वडाध्यक्ष सविन थापाले भने।
अहिले राजमार्ग खुलएर अवस्था नियन्त्रणमा लिइएको धनुषाका प्रहरी प्रवक्ता डिएसपी वेद प्रसाद गौतमले बताए। आफु घटनास्थलतर्फ हिडेकाले पुगेपछि थप कुरा बुझेर बताउने उनले बताए।
