सर्वोच्च अदालतले हुम्लामा नियमित उडान गर्न र अरू जिल्लाको तुलनामा उचित भाडादर कायम गर्न आदेश माग गर्दै परेको रिटमा अन्तरिम आदेश जारी गरेको छ।
रामबहादुर शाहीले दायर गरेको रिटमा न्यायाधीश हरि फुयाँलको इजलासले यस्तो आदेश गरेको सर्वोच्च अदालतको वेवसाइटमा उल्लेख छ।
अधिवक्ता शाहीको रिटमा बहस गरेका बरिष्ठ अधिवक्ता टीकाराम भट्टराईले निवेदकले माग गरेको आदेश इजलासले दिएको बताए।
‘लिखित आदेशमा के भनेर लेखिन्छ थाहा छैन तर अन्तरिम आदेश जारी भनेपछि निवेदकले मागेबमोजिम आदेश दिएको बुझिन्छ,’ उनले सेतोपाटीसँग भने।
उनका अनुसार नेपाल वायु सेवा निगमले नेपालगञ्जदेखि बाजुरासम्म ४ हजार भाडा तोकेकोमा उत्तिकै दूरीको हुम्लामा भने ९ हजार रुपैयाँ तोकेको छ। त्यसमाथि नियमित उडान नगर्ने, हप्तामा दुई दिनमात्र उडान गर्ने समय तालिका तोकेपछि निवेदकले सर्वोच्चमा रिट हालेका थिए।
‘बाजुरामा निजी कम्पनीका जहाज पनि जाने भएकाले प्रतिस्पर्धा भयो थोरै भाडा तोक्यो। हुम्लामा भने नेपाल वायुसेवा निगम मात्र जाने भयो त्यसले गर्दा मनपरि भाडा तोक्यो,’ बरिष्ठ अधिवक्ता भट्टराईले भने, ‘सडक सुविधा राम्रो नभएको हुम्लामा जहाजमात्र यातायातको विकल्प भएकाले सरकारले अनुदान दिएर भए पनि भाडा सस्तो गर्नुपर्ने धारणा मैले इजलासमा राखेको थिएँ। अरू साथीहरूको पनि त्यही माग थियो। इजलासले अन्तरिम आदेश दियो।’
यो मुद्दामा निवेदक अधिवक्ता शाही, बरिष्ठ अधिवक्ताहरू भट्टराई, मेघराज पोखरेल, दिनेश त्रिपाठी लगायतले बहस गरेका थिए।
