अहिले बर्षातको मौसम छ। नेपालका धेरै महिलाहरू आफ्ना भित्री वस्त्रहरू बाथरूममा सुकाउँछन्। त्यस्ता भित्री वस्त्र चिसो छ कि छैन भनेर छामेर प्रयोगमा ल्याउँछन्।
तर यसरी घाममा नसुकाइएको कपडामा ढुसी रहन्छ। त्यसमा फंगस किटाणु उत्पन्न हुन्छ। फंगसका किटाणु आँखाले देख्न सकिँदैन जसबाट गुप्तांगमा संक्रमण हुन सक्छ।
त्यसैले कपडा सुकाउने कुरामा हामीले धेरै ध्यान दिनुपर्छ।
वर्खा मौसममा घाममा कपडा सुकाउन सकिएन भने कपडामा तातो आइरन प्रयोग गर्नुपर्छ। त्यसले किटाणु मर्छ। महिलाहरू औसतमा सातामा दुईदेखि तीनपटक नुहाउँछन्। गर्मी र वर्खामा सरसफाइ दैनिक गर्नुपर्छ, दैनिक नुहाउनुपर्छ।
सरसफाइमा ध्यान दिन नसक्दा योनीको संक्रमण (भजाइनल इन्फेक्सन) हुन सक्छ।
गुप्तांगको द्वारमा हुने संक्रमण 'भजाइनल कन्डेडियासिसलाई' लाई हामी योनीमा हुने फंगल इन्फेक्सन भन्छौं। यो भनेको किटाणुले गर्ने संक्रमण हो जसलाई हामी फंगस भन्छौं।
यस्तो संक्रमण भएको थाहा पाउने केही लक्षणहरू छन्।
मुख्यगरी चिलाउने समस्या हुन्छ। त्यस्तै योनीबाट सेतो पानी बग्छ जुन दहीको छोक्रा जस्तो अथवा पनिरजस्तो हुन्छ। लगातार यस्तो पानी बग्ने अथवा चिलाउने भयो भने त्यो फंगल इन्फेक्सनको लक्षणका रूपमा बुझिन्छ।
नेपालमा धेरै महिलाले यस्तो लक्षण देखिनेबित्तिकै मेडिकलमा गएर औषधि खाने र मलम किनेर लगाउने गरेका छन्। यो गलत हो।
किनभने, हरेक चिलाउने लक्षणकै आधारमा फंगल इन्फेक्सन भएको भन्ने हुँदैन। त्यसैले हामीले विज्ञ डाक्टरलाई देखाउन जरूरी छ।
यस्तो संक्रमण उपचारका लागि औषधि पाइन्छ। तर कति समय त्यस्तो औषधि प्रयोग गर्ने, कति मात्रामा प्रयोग गर्ने र दोहोर्याएर हुने संक्रमणका घटनामा कस्ता मलम प्रयोग गर्ने र गुप्तांगमा कस्ता ट्याबलेट राख्ने भन्ने विषयमा डाक्टरसँग सल्लाह नै गर्नुपर्छ।
ब्लुक्रस हस्पिटल र नर्भिक हस्पिटलमा कार्यरत स्त्री तथा प्रसूति रोग विशेषज्ञ एवं ल्याप्रोस्कोपिक सर्जन डा. रंगिना लाइकंगबमसँग सेतोपाटीले गरेको भिडिओ कुराकानी-