काठमाडौं महानगरपालिकाका प्रमुख बालेन शाहले बुद्धि, विवेक पुर्याएर काम गर्न नगर प्रहरी बललाई निर्देशन दिएका छन्।
बिहीबार महानगरपालिकाको नगर प्रहरी बलको स्थापना दिवसको अवसरमा आयोजित कार्यक्रमलाई सम्बोधन गर्दै प्रमुख शाहले बुद्धि, विवेक पुर्याएर काम गर्न प्रहरीलाई निर्देशन दिएका हुन्।
‘एउटा मात्रै व्यक्तिमा बुद्धि–विवेक, इमानदारिता र हिम्मत तीन वटै गुण भएको खासै पाइँदैन। यो तीन वटै गुण राखेर काठमाडौं महानगरपालिकाका नगर प्रहरी प्रमुख राजुनाथ पाण्डेले भूमिका निभाउनुभएकोमा पनि धेरै धेरै धन्यवाद दिन चाहन्छु’, उनले भने, ‘साथसाथै नगर प्रहरी बलले बुद्धि–विवेक पुर्याउनुपर्ने ठाउँमा बुद्धि–विवेक पुर्याउनुहोला। संवेदनशील हुनुपर्ने ठाउँमा संवेदनशील पनि भइदिनु होला। हिम्मतले काम गर्नुपर्ने ठाउँमा हिम्मतिलो पनि भइदिनु होला। इमानदार त सधैं हुनु नै पर्नेछ।’
उनले संवेदनशील हुनुपर्ने ठाउँमा संवेदनशील भएर काम गर्न पनि आग्रह गरे। उनले नगर प्रहरीलाई हिम्मतले काम गर्न पनि आग्रह गरे।
प्रमुख शाहले नगर प्रहरीले कुनै पनि प्रकारको नातावाद, कृपावाद र राजनीतिक दबाबबिना काम गरिरहेको उल्लेख गर्दै यसप्रति महानगरपालिकाको सबै जनप्रतिनिधि खुसी भएको बताए।
‘हाम्रो नगर प्रहरी बलले कुनै पनि नातावाद, कृपावाद र कुनै पनि राजनीतिक दबाबबिना काम गरिरहेको छ। सुशासनको लागि कुनै पनि राजनीतिक दबाब बिना नै काम गर्न सफल भएको छ’, उनले भने।
उनले महानगरपालिकाले १५० रोपनीभन्दा बढी सार्वजनिक जग्गा संरक्षण गर्न सफल भएको, पार्किङ व्यवस्थापनमा लागेको र अवैधानिक संरचनाहरू हटाएर सुशासन कायम गराउन लागेको उल्लेख गर्दै यस काममा नगर प्रहरीको भूमिकाको प्रशंसा गर्दै धन्यवाद व्यक्त गरे।
‘काठमाडौं महानगरपालिका क्षेत्रभित्र रहेका सार्वजनिक जग्गालाई संरक्षण गर्ने क्रममा १५० रोपनीभन्दा बढी सार्वजनिक जग्गा संरक्षण गर्न सफल भएकोमा तपाईंहरूलाई धन्यवाद दिन चाहन्छु। काठमाडौं महानगरपालिकाका सबै क्षेत्रहरूमा पार्किङको व्यवस्थापन गर्न नगर प्रहरी लागिपरेको थियो’, उनले भने,‘साथसाथै सुशासनको क्रममा अवैधानिक व्यापारहरू, अवैध संरचनाहरू हटाएर देशमा सुशासन ल्याउनलाई एउटा सिम्बोलको रूपमा नगर प्रहरीले काठमाडौंबाट सुरू गरेर देशभरि नै यो कुरा निर्णय गर्न सफल हुनुभएको छ। तपाईंहरूले देशलाई नै उदाहरण दिन सक्षम हुनुभएको छ।’
काठमाडौं महानगरपालिकाको कामले देशभर नै त्यस प्रकारको निर्णय गराउन सफल भएको पनि उनले बताए।
उनले नेपाल प्रहरी र सशस्त्र प्रहरीले पनि राजनीतिक दबाबमा नआइकन काम गर्न सकेमा सहरमा सुशासन ल्याउन सकिने भन्दै प्रहरी नेतृत्वलाई आग्रह समेत गरे।
