कास्कीको मादी गाउँपालिका वडा नम्बर १ खिलाङ गाउँ र वडा नम्बर ६ तप्राङ गाउँमा पहिरो जाँदा स्थानीयको घर र गोठ भत्किएका छन्।
बिहीबार रातिदेखि परेको अविरल वर्षासँगै गएको पहिरोले तप्राङको भेडिखर्कमा स्थानीय वीरबहादुर रानाको घर पूर्ण रूपमा क्षतिग्रस्त भएका छन् भने अरू २ वटा घरलाई पनि बस्न नमिल्ने गरी जोखिममा पारेको छ।
मादी वडा नम्बर ६ का वडाध्यक्ष दीलबहादुर क्षेत्रीका अनुसार भेडिखर्कका बिरबहादुरको घर जगबाटै पहिरो गएको छ। पहिरोले भैंसीगोठ र कुखुराको खोर पनि बगाएको वडाध्यक्ष क्षेत्रीले बताए।
उनका अनुसार तप्राङकै सयपत्री टोलमा सूर्यबहादुर थापाको घर, गोठ र कुखुराको खोर पनि पहिरोले बगाएको छ। थापाले घरमै किराना पसल र खाजाघर पनि चलाएका थिए। पहिरोले घर गोठ भत्किए पनि मानवीय र पशुपंक्षीको क्षति भने भएको छैन। पहिरोले गर्दा पोखराको काहुखोलादेखि दूधपोखरी सडक पनि अवरूद्ध भएको वडाध्यक्ष क्षेत्रीले बताए।
मादी वडा नम्बर १ खिलाङ गाउँमा पनि पहिरोले स्थानीय डुमप्रसाद गुरूङको गोठ पुरेको छ। गोठमा बाँधेर राखेका २ वटा भैसी पहिरोले पुरेको स्थानीयसमेत रहेका वडा सदस्य प्रेमबहादुर गुरूङले बताए। उनका अनुसार पहिरोले गाउँका करिब ३५ घर जोखिममा परेका छन्। पोखराबाट सिक्लेस जाने बाटोमा पर्ने खिलाङ गाउँमा करिब १५० घरधुरी रहेको गुरूङले बताए।
पहिरोको क्षतिको विवरण आउन बाँकी रहेको मादी वडा नम्बर १ का वडाध्यक्ष देवीजंग गुरूङ र वडा नम्बर ६ का वडाध्यक्ष क्षेत्रीले बताएका छन्। पहिरोले पुर्याएको क्षेतीबारे गाउँपालिका र प्रहरीलाई जानकारी दिएको उनीहरूले बताएका छन्।
