ताप्लेजुङमा निर्माणाधीन पाथीभरा केवलकार निर्माणको काम छिटो सकेर सञ्चालनमा ल्याउन स्थानीयहरू समूहले र्याली निकालेको छ।
सदरमुकाम फुङ्लिङमा ‘विकासप्रेमी युवा समाज’ को ब्यानरमा निकालिएको र्यालीमा स्थानीय बासिन्दा, विभिन्न संघसंस्थाका प्रतिनिधिहरू लगायतको सहभागिता आइतबार र्याली निकालिएको हो।
र्यालीमा सहभागीहरूले केवलकार निर्माणले ताप्लेजुङको पर्यटन प्रवर्द्धनमा महत्वपूर्ण योगदान पुग्ने भन्दै निर्माण कार्यलाई निरन्तर अघि बढाउनुपर्ने माग गरेका थिए। निर्माणको कामममा अवरोध नगर्न र काम छिटो सक्न निकालिएको र्याली फुङ्लिङ
बजार परिक्रमा गरेपछि चोकमा सभामा परिणत भएको थियो।
सभालाई सम्बोधन गर्दै सरोकारवालाहरूले सरकारले निर्माण कार्यका लागि आवश्यक वातावरण मिलाउनुपर्ने आवश्यकता औंल्याएका थिए।
उनीहरूले परियोजना करिब ६० प्रतिशत पूरा भइसकेको अवस्थामा यसलाई स्थगन गर्नु उपयुक्त नहुने बताउँदै छिटो निर्माण सम्पन्न हुने वातावरण बनाउन आग्रह गरेका छन्।
कार्यक्रममा फुङ्लिङ नगरपालिकाका प्रमुख अमिर मादेन, पाथीभरा मन्दिर क्षेत्र संरक्षण तथा सम्बर्द्धन समितिका अध्यक्ष तारानाथ घिमिरे, ज्येष्ठ नागरिक अगुवा कर्ण लिम्बू, जेनजी अगुवा करण गुरुङ, महिला नेतृ मिना गुरुङ, युवा अगुवा पदमचेन्जी माबो लगायतले आ-आफ्ना धारणा राखेका थिए।
निर्माण पक्षका अनुसार परियोजनाको करिब ६० प्रतिशत काम सम्पन्न भइसकेको छ। निर्माणकै क्रममा सरकारले स्थगन गर्न निर्देशन दिएको भन्ने चर्चा चलिरहेका बेला, निर्माण कार्य अघि बढाउन वातावरण बनाउनुपर्ने मागसहित र्याली आयोजना गरिएको जनाइएको छ।
यता केवलकार निर्माणको बिरोध समेत हुँदै आएको छ।
केवलकार खारेजी संयुक्त संघर्ष समिती र मुक्कुमलुङ संयुक्त संघर्ष समितिले केवलकार खारेजको माग गर्दै गर्दै आएका छन्।
