सम्पत्ति शुद्धीकरण विभाग र केन्द्रीय अनुसन्धान ब्युरो (सिआइबी) को अनुसन्धानमा रहेका दिपक भट्ट, सुलभ अग्रवाल, शेखर गोल्छा लगायत विरूद्धको अभियोगपत्र सरकारी वकिल कार्यालयमा अभियोजन क्रममा छ।
विभागले गत साता उनीहरू विरूद्ध मुद्दाको अनुसन्धान प्रतिवेदन विशेष सरकारी वकिलको कार्यालयमा बुझाएको हो।
अभियोजनका लागि पेस भएको उक्त अनुसन्धान प्रतिवेदन अहिले अध्ययन क्रममा रहेको सरकारी वकिलको कार्यालयका सूचना अधिकारी पूर्णेन्द्र पाण्डेयले जानकारी दिए।
'यो मुद्दा अभियोजनकै क्रममा छ। हामी प्रतिवेदन अध्ययन गर्दैछौं। यसका लागि बिदाका दिनमा पनि साथीहरू आएर काम गर्दै हुनुहुन्थ्यो। अभियोजन सकेर मुद्दा अदालत लैजान्छौं,' उनले भने, 'सम्पत्ति शुद्धीकरण कसुर मात्र होइन, यससँग विविध मुद्दाहरू जोडिएका छन्।'
अर्कातिर सिआइबीले पनि उनीहरू विरूद्ध चारवटा छुट्टाछुट्टै कसुरको मुद्दा बुझाइसकेको छ।
सिआइबी प्रमुख एआइजी मनोजकुमार केसीका अनुसार बीमा ऐन २०७९, धितोपत्र सम्बन्धी ऐन २०६३ सँग सम्बन्धित दुईवटा कसुर र एउटा बैंकिङ कसुरको अभियोगपत्र सरकारी वकिलको कार्यालयमा पेस गरिएको छ।
'अनुसन्धान सकेर हामीले केही समयअघि नै अभियोगपत्र बुझाइसकेका छौं,' उनले भने, 'प्रतिवेदन ठूलो भएकाले सरकारी वकिलले अभियोजनको पाटो हेरिरहेको छ।'
उनका अनुसार बीमा ऐन २०७९ अनुसारको कसुरमा भट्ट, अग्रवाल र गोल्छासहित ४० जनालाई प्रतिवादी कायम गरिएको छ। यो कसुरमा प्रहरीले ४ अर्ब रूपैयाँभन्दा बढीको बिगो कायम गरेको छ।
त्यस्तै, धितोपत्र सम्बन्धी कसुरमा एक अर्ब रूपैयाँभन्दा बढी बिगो कायम गरिएको छ। यसमा उनीहरू तीनै जनासहित ७५ जना प्रतिवादी कायम छन्।
बैंकिङ कसुरमा भने ५४ करोड रूपैयाँभन्दा बढी बिगो कायम गरी तीन जनाभन्दा बढीलाई प्रतिवादी कायम गरिएको छ।
जिल्ला सरकारी वकिलको कार्यालय काठमाडौंका प्रमुख तथा सहन्यायाधिवक्ता सोमकान्त भण्डारीले विशेष सरकारी वकिलले अभियोग दर्ता गरिसकेपछि आफूहरूले लग्ने बताए।
'विशेष सरकारी वकिलमार्फत प्रतिवादीहरूको म्याद थप भएको थियो। अनुसन्धान सकिएको छ। अब विशेषले मुद्दा दर्ता गरेसँगै हामी पनि गर्छौं,' उनले भने।
सम्पत्ति शुद्धीकरणसँग सम्बन्धित अनुसन्धानका लागि दीपक भट्टलाई विभागले चैत १९ गते पक्राउ गरेको थियो। त्यसको तीन दिनपछि चैत २२ गते अग्रवाललाई पक्राउ गरिएको थियो।
शेखर गोल्छालाई वैशाख १० गते पक्राउ गरिएको थियो। उनलाई सर्वोच्च अदालतले हिरासतमुक्त गर्न आदेश दिएको थियो।
-1780906942.jpg)
